Talerperliit suleqatigiissitaata kalaallit palasissaat inassutigisimavaa
Suleqatigiit pineqartut suliaannit paasissutissanik KNR pissarsivoq. Inassuteqaat taanna siorna apriilip qaammataanili piareeqqasimavoq qanittorli tikillugu taassuma takunissaa KNR-imut ajornartinneqarsimavoq naalakkersuisut siuliisa sulinermi pappiaqqat najoqqutassatut isigimmassuk.
Suleqatigiilli pineqartut inassutigisimavaat kalaallit palaseqartinnissaat Aarhusip palaseqarfiata ataani inissisimassasoq, palasillu taassuma sullitassarissagai kalaallit nammineq piumassutsiminnik Danmarkimut nuussimasut.
Kalaallit Danmarkimi najugallit naatsorsuinermit malillugit ukiumut 16 millioner koruuninik ilagiinnut akileraartarput. Taamaammat suleqatigiit isumaqarput pissusissamisoortoq kalaallit palaseqartinneqarnerata Danmarkimit akilerneqarnissaa.
Suleqatigiit 2010 naalersoq pilersinneqarput ministerip ilageeqarnermut Nunatsinni Naalakkersuisoq aamma Naalakkersuisut siulittaasuat oqaloqatigereerai. Suleqatigiinnut suliakkiissutigineqarpoq kalaallit, savalimmiormiut allallu nunani avannarlermiut ilaagiinni Danmarkimi sullinneqarnerisa misissussagaat. Ilanngullugu misissoqquneqarpoq inuiaat pineqartut Danmarkip akiligaanik ilagiinni sullinneqarnissaasa misissuiffineqarnissaa.
Suleqatigiit tassaapput biskop Peter Skov-Jakobsen Københavnip bisk0peqarfianeersoq, biskop Kresten Drejergaard Fynip biskopeqarfianeersoq, Pernille Esdahl ilageeqarnermut ministeriaqarfimmeersoq kiisalu paasissutissiisarnermut siunnersorti Jørgen Engmark
Savalimmiormiut Danmarkimi aamma palaseqarput, eqqornerusumilluunnit taallugu 0,7-mik palaseqarput, tassa taanna aamma Københavnimi Samuels Kirke-mi ilagiinnik sullissisarmat. Atorfik taanna 1970-miilli Danmarkimit aningaasalersorneqarpoq. Manna tikillugu oqaatigineqartarsimavoq atorfik taanna inuttassarsiorneqassappat Savalimmiut tamanna akilissagaat. Suleqatigiilli inassutigaat atorfik taanna suli Danmarkimit aningaasalersorneqassasoq sulilu annertusillugu piffissaq tamakkiisoq savalimmiormiunik Danmarkimi sullissisussanngorlugu allanngortinneqassasoq.
Taassumali saniatigut suleqatigiit isumaqarput Danmarkip akisussaaffiginngikka inuiaat allat nunani avannarlerneersut ilageeqarnikkut sullinneqarnissaat.
