Folketingimut qinersineq 2015 Talerperliit isumasiuinermi nutaami siuaqqalersut
Voxmeterip, nutaarsiassaqartitsivik Ritzau sinnerlugu inunnik isumasiuisimanerata takutippaa partiit talerperliit 51,4 procentinit taaguunneqassasut, partiillu saamerliit, Socialdemokratit siulittaasuat Helle Thorning-Schmidt siuttoralugu, 48,6 procentinit taaguunneqassasut.
Taamaalillutik partiit talerperliit 89-inik ilaasortaatitaqalissapput, saamerliillu 86-inik ilaasortaatitaqalissallutik.
Atlantikulli Avannaani qinikkat matumani ilaatinneqanngillat, kinalu juunip Danmarkimi ulluisa 18-iata kingorna ministeriunertut inississanersoq suli nalunarluni.
Danmarkimi inunnik isumasiuinerit assigiinngitsut assigiinngitsunik inerniliisarput. Aviisip ullormut saqqummersartup Politikenip inunnik isumasiuisitsisimanerata takutippaa partiit saamerliit amerlanerussuteqaqqalaassasut, tassami 50,1 procentinit taaguunneqarnissaat ilimagineqarami, partiillu talerperliit 49,9 procentinit taaguunneqassangatinneqarlutik.
