Talebanit sunniuteqaraluttuinnarnerat ajornakusoortitsivoq
Novembarip sisamaanni præsidentimut qinersisoqareerpat nalunaarusiaq tamakkiisoq saqqummiunneqassaaq.
Nalunaarusiassatut siunnersuummi aviisip New York Timesip pissarsiarisimasaani inerniliussaq paatsuugassaanngilaq. Afghanistanimi ingerlatsineq uteqattaartumik ajorsiartuinnarpoq. Naalakkersuisut qitiusumik ingerlatsivii ajutoorluinnarsimapput. Minnerunngitsumik præsident Hamid Karzaip naalakkersuisuini peqquserlunniarnerujussuaq pissutigalugu, aammali Talebanit sakkulersortut Pakistanimi isertorfimminniit saassussisarnerat sakkortusigaluttuinnarmat, naak Amerikamiut sakkutuui siuttuliullugit NATO-p sakkutuuinit akiorniarneqaraluarlutik.
Ajornartorsiutit angisuut nalunaarusiami taaneqartut ilagaat heroinimik tuniniaanerup alliartuinnarnera. Nalunaarusiami oqaatigineqarpoq heroinimik tuniniaaneq Afghanistanimi aningaasarsiornerup 50 procenterigaa. Taamalu Talebanit taakkununngalu illersuisut Al-Qaidakkut sorsunnerisa aningaasalersornerannut pingaaruteqartorujussuulluni.
Amerikamiut illersornissamut ministeriata Robert Gatesip oqaatigaa heroinimik tuniniaaneq Talebanit ukiumut 500 mio. koruunit sinnerlugit iluanaarutigisaraat. Taamaalillunilu pikitsitsinianut aningaasalersuisuusoq.
Taamaattumik NATO-mi illersornissamut ministerit Budapestimi ullumikkut aqagulu ataatsimiinnissaminni USA-mik illersuisut qinnuiginiarpaat Afghanistanimi opiumimik naatitsisarnerup sakkortunerusumik akiorneqarnissaanut suleqataaqqullugit.
Robert Gatesip NATO-mut ilaasortat aamma qinnuiginiarpai amerlanerusunik Afghanistanimi sakkutuuleeqqullugit, taamaalilluni Talebanit sakkortunerusumik akiorneqarsinnaaniassammata. Tassami USA-p upperaa, Talebanit sakkutuunit akiorneqarnerisigut susinnaajunnaarsinneqarsinnaasut.
