Talebanit Pakistanimit saassusseqattaartaqquneqartarput
Namminneq sorsukkunnaarlutik naapeqatigiillutik isumaqasiorsinnaagaluarput Pakistanimiulli taamaaliortinnaveersaarpaat, talebanit oqarput.
ISI, Pakistanimiut paasiniaasarfiat. Pakistanimiut qularnanngitsumik pisariaqartitaminnik paasiniaasarfiat imaluunniit Amerikamiut AF-PAK-imik taasartagaanni, tassa Afghanistanimi Pakistanimilu, sunik tamanik suujunnaarseriaannaasoq.
ISI-p 1990-ikkut ingerlaneranni talebanit pilersippaat taakkualu iluaqutigalugit Afghanistanimi innuttaasut aqunniarsaralugit.
2001-imi septemberip aqqarnata kingorna Pakistan nalunaarpoq paasiniaasarfiup pinerliiniat umittuut suleqatigiunnaarsimagaat taakkuamigooq Al Qaeda suleqasiussimammassuk. Tamannali ilumoornerpa? Afghanistanimiut naalakkersuisuisa Karzai siuuttoralugu taamaassorinngilaat, Pakistaninngooruna tappavani sorsuunneq taanna iluaqutsiullugu ingerlatiinnaraat.
Talebanit aqutsisuisa aviisip Wall Streetip oqaloqatigisimasaasa tamanna maanna ilumoornerarpaat.
Karzaip naalakkersuisuisa Amerikamiullu talebanit isumaqatiginiarsarigaluarpaat imaluunniit akilersorlugit, suliffissaannik tunisarlugit pissaaneqartilerlugillu eqqisseqatiginiarsarigaluarlugit.
Tamannali iluaqutaanngilaq. Sorsunnerup maanna ukiut qulissaanik ingerlanerani peqqarniisertarnerit aatsaat taama ingasatsigilerput.
Talebanit oqaloqatigineqartut oqarput ISI sorsuffimmi ima pissaaneqartigisoq allaat peqqarniisernerup sakkortusineqarnissaa sorsuttartut naalagaannut naalakkiutigisarlugu. - Naalakkiutinut naalakkumanngitsut ISI-meersut tigusarisarpaat, talebanit naalagaat oqarpoq.
Amerikap sakkutuuini tusarfik aamma taamaanneraavoq. Tamannalu talebaninit namminneq tigusarisimasaminnit tusarsimavaat.
Talebanit naalagaata oqaloqatigineqartup allamiut sakkutuuinut akersuuttarnissani suli naatsorsuutigivaa ISI-lli kikkut tamarluinnaasa toqorartassagaat maannakkut naalakkiutigisimavaa, tassa politiit, sakkutuut, inginiørit ilinniartitsisut inuinnaallu. Inuinngooq annilaangatinneqassammata.
Pakistanip paasiniaasarfimmi talebaninut attaveqarnera sutigut tamatigut nangartorpaa.
