Talebanit al Qaedalu saassussinnaanerlugit misissulerpaat

USA-mi inatsisartut illersornissamut ataatsimiititaliaata Talebanit aamma Al Qaidamut ilaasortat Pakistanimi Afghanistanimut killeqarfiup eqqaani toqqorsimasut saassunnissaat periarfissaqarnersoq misissortinnialerpaa. Tassami pikitsitsiniat annerujartuinnartumik tamaanngaanniit nunami allamiut sakkutuuinik saassussisarmata. Amerikamiut politikerit Pakistanimi præsidentip Musharafip Talebanit aamma Al Qaida Afghanistanimut killeqarfiup eqqaaniittut susinnaajunnaarsissinnaanngimmagit qatsulluinnarpaat. Demokratit Republikanerillu illersornissamut ataatsimiititaliami ilaasortaasut misissorusuppaat Amerikamiut sakkutuuisa Afghanistanimiittut Talebaninik Al Qaidamillu saassusisinnaanissaannut FN-ip naalagaaffinnut malittarisassaani periarfissaqarnersoq. Ataatsimiititaliami tunngavilersuipput Amerikamiut Afghanistanimut isaasimasut Talebanit Al Qaidalu akiorniarlugit eqqortuusinnaannginnerarpaallu taakkunannga saassutarineqartuaramik upernaamullu saassutarineqarnissaminnik sioorasaarneqaramik. Maanna Amerikamiut Afghanistanimi saassussisoqartillugu Talebanit Al Qaidalu Pakistanimut qimaatillugit malersuinissaminnut akuerisaareerput. Maannali piumasarilerpaat toqqorsimaffiinut qaartartumeerisinnaanissartik, tassami Al Qaida tamaani piareersartoq tusaamaneqarmat. Sapaatip akunnerani uani Amerikami præsidentip tullia Dick Cheney sunniiniarluni Pakistanimiippoq. Kisianni naak Pakistanip USA peqatigalugu Al Qaida-mut sorsukkaluarluni ilungersunartumik inissisimavoq. Tassami præsident Musharaf sakkuaattartunit upperisarsiortunillu tatisimaneqarpoq, taakkualu Amerikamiut saassussissagaluarpata akerliussutsimik takutitsinernut siuttuusussaapput. Pakistanimi nunap immikkoortuisa affaat partinit Talebaninut inussiarnersunit aqunneqarput. Amerikamiullu saassussissagaluarpata taakkua sukataarneruleriaannaapput, tamatumalu præsident Musharafip tunuartariaqalernera kingunerisinnaavaa.