Taleban atuarfinnik matooraanini iluatsippaa

Afghanistanimi Talibanit atuarfinnik matooraaniarlutik sioorasaarinertik iluatsippaat
Allattoq Jaaku Lyberth
aggustip 19-at 2010 17:22

Nunap avannaatungaani nunap immikkoortuisa ilaanni atuarfinnit 46-sunit 45-t matuneqarput. NATO-p sakkutuuisa nunap kujataani Talibaninut akiuunneranni Talibanit nunap avannaani eqqissimaffiugaluartumi nunaqarfeeqqamiit nunaqarfeeqqamut tiguaasaqattaarput - imatorsuarlu akiorneqaratik. Nunap immikkoortua Kuhr Afghanistanip qiterpasissuata avannaani kitaaniippoq. Innuttaasa amerlanersaat tatikkerinit kingoqisuupput Talibanillu Patsunerinik kujataaniittunik illersorteqartut isumaqatiginngivillugit, taamaakkaluartorli Talibanit maannakkut nunap immikkoortuanik tassannga nakkutilliineq tigusimallugu. Nunap immikkoortuani Peshawanimi atuarfinnit 46-sunit 45-t matuneqarput, Talibanit atuartoqannginnissaa peqqussutigimmassuk. Angajoqqaat amerlaqisut nunap immikkoortortaasa eqqaamiuisa meeqqatik atuaqqunagit angerlarsimatippaat Talibanit naakkittaaqalutik pillaasarnerat annilaanngatigigamikku. Kuhrimi nunap immikkoortua annilaanganartumik pisoqalerneranut assersuutissat ilagiinnarpaat, taama isumaqarpoq Afghanistanimi naalakkersuinermik naliliisartoq. - Talibanit illoqarfeeqqanik tiguaajartuinnarneranni naalakkersuisut sapersinneqariartorput, ima annertutigisumik, allaat naalakkersuisut illuatungiliuttullu taamaallaat illoqarfinnik anginerusunik illersuisinnaalerlutik, tassami nunap immikkoortui Talibaninit tiguarneqarsimasutut ilermata, taanna taama oqarpoq.

Afghanistanimi qinersinermut kommissionip nalunaarutigaa inatsisartunut qinersisoqarnissaani pisussami isumannaallisaanissaq ilungersunassasoq. Afghanistanimi nunap immikkoortuinit 25-usunit ajornartorsiuteqartoqarnera nalunaarutigineqarpoq, pissutsillu eqqortut imaallutik, nunap provinsiinit 34-usunit Talibaninit najorneqanngitsut qulingiluaannaat naalakkersuisutigoortumik amiakkuulersimasut.

- Maanna Talibanit siornatigut tamaaniissimanngisaannartut takkussimapput, taanna taama oqarpoq.