Takunnittoq: - Bredahl nammineq pisuuvoq

Sapaatiummat ullaakkut Københavnimi Strøget-mi kalaallip 18-inik ukiullip tilluuttartumut persuttaanera pillugu aviisi Ekstra Bladet allarluinnarmik ullumi allaaserisaqarpoq.

Pisoq pillugu malinnaasimasoq 18-inik ukiullip illuusaaraa Charlie Reiding takusani pillugu aviisimut ima oqaluttuarpoq.

- Uanga nammineq taakaniippunga, politiit tusagassiutillu oqaluttuaat arlaannaalluunniit ilisarisinnaanngilara, Charlie Reiding oqarpoq.

Taanna oqaluttuarpoq kammalaatinilu allat pingasuullutik Johnny Bredahl ikiorniarsimagaluaritsik. Inuusuit tamarmik aalakooqalutik Strøget-mi pisiniarfiit ilaasa silataani naapissimapput.

Oqaluttuarpoq 18-inik ukiullip aalakualaaqisup Bredahl puiaasamik plastikkimik milorsimagaa Bredahlilu isimi illuata eqqaatigut kilerami aanaartitsisorujussuanngorsimasoq.

- Illuusaarara tupannini pissutigalugu taama iliorpoq, Charlie Reiding Ekstra Bladet-mut oqarpoq.

Tassamigooq tilluuttartup taassuma illuusaaqqani qaavatigut tillussimavaa, illuusaaqqanilu tupannermik kamalersimasoq taamalu puiaasamik Bredahl milorsimallugu kingornalu taava eqqissinerusimavoq.

- Aammalumi uagut Bredahl annaanniarlugu ikiorniarsarigaluarparput, Charlie Reiding oqaluttuarpoq.

- Arlaannaataluunniit isimmittanngilaa tukkarnagulu, Charlie Reiding oqarpoq