Takornartat qanoq najugaqassappat?

- Kalaallit periarfissaqarput allaanerusunik najugaqartitseriaaseqarnissaminnut, sulisartut najugaqarfii inuiaqatigiinnut ammasuusinnaapput tikikkuminartuullutillu, illussanik titartaasartoq David Garcia oqarpoq.

- Migration Greenland-imik qulequtalerlugu suliami misissorparput, aatsitassarsiornermi suliartorlutik tikittartussat imaluunniit takornariarlutik tikittartussat sunniutissaat unammillernartortaalu, Rune Christiansen illussanik titartaasartut Kitaa Arkitekter sinnerlugit suleqataasoq oqarpoq.

Taanna danskillu illussanik titartaasartut marluk suleqatigalugit siunissami nunatsinnut suliartortussat najugaqariaasissaat pillugu siunnersuuteqassallutik suliaqarput. Suleqatigiillu Ilulissat illoqarfiat aallaavigalugu siunnersuuteqartussaapput.

- Nunani allani suliartortitat najugarisartagaat pillugit paasissutissanik suleqatigiit katersuipput. Nunani allani tikisitatut sulisartut najugaqarfii inuiaqatigiinnut akulerussimasanngillat matoqqasuusarlutillu, Kalaallit Nunaannili allatut najugaqartitseriaaseqarsinnaaneq periarfissaasoq, illussanik titartaasartoq David Garcia oqarpoq.

- Kalaallit periarfissaqarput nunarsuarmioqatiminnut takutissallugu, tikisitanik suliartortunik allatut najugaqartitseriaaseqarsinnaallutik, najugaqarfii inuiaqatigiinnut ammasuusinnaapput tikikkuminartuullutillu. Nunanit allanit suliartorlutik tikittut kulturertik pillugu kalaallinut takutitsinissaminnut periarfissaqarsinnaassallutik, aamma Kalaallit taakkununnga takutitsisinnaassallutik. Imminnut ilisareqatigiinnissamut periarfissaqarput, paatsooqatigiissinnaanerillu pinngitsoortinneqarsinnaallutik, David Garcia oqarpoq.

Suliap inernera saqqummersitassami Future Greenlandimik taaguuteqartumi peqataatinneqassaaq.

Illussanik titartaasartut saqqummersitsinissamut suliaat, Kalaallit Nunaanni ineriartornermut siunissamilu unammillernartunut attuumassuteqartuusut,  Saqqummersitsinissamut akisussaaqataasoq Minik Rosing oqarpoq.

Borgmesterit sisamat sulianut alaatsinaattuupput,  sammineqartullu piviusorsiortuusut, Kommune Kujallermi borgmesteri Simon Simonsen isumaqarpoq .

- Kalaallit Nunatsinni inuiaasugut tikinneqartussaavugut inuppassuarnit, qanoq uatsinnut akulerutsinniassuagut, akornutiginagit immaqa iluaqutigalugit, tamakku assigiinngitsut sammineqartut isumaqarpunga ajunngiivissut aamma pissanganartutut isigivakka assut, Simon Simonsen oqarpoq.