Takornarnianut inatsisit qulit

Nunarput aningaasarpassuarnik millionilikkaanik takornariaqarnermut aningaasaliinikuuvoq, qularutissaanngitsumillu aningaasat taakkua atulussinnarneqarsimanngillat, tassami umiarsuarsuit takornarianik angallassisut tulleriiaaginnaat nunatsinnut tikittarput takornariallu tikerartut amerlaqalutik.

Ingammik Ilulissani takornariat amerleriarnerat maluginiarneqarpoq. Kisianni takornariat tamarmik pissuserissuuppat? Ilulissani arlaleriarluni takornariat uteriitsut naammattoorneqartarput. Apereqqaanngivillutik apersortittut qanittuararsuanngorlugit assiliniarserisinnaasarpaat. Imaluunniit takornariat tupersimaartut illut silataannut naatsiiviinulluunniit quisarput.

Kirsten Strandgaardip Ilulissani katersugaasivimmi pisortaasup suliffiup avataatigut inuunini innimiilliorfigineqartoq malugisimavaa. Tamanna tunngavigalugu Nunatta Avannaani takornarianut ‘inatsisit qulit’ suliarai. Taakkua oqallissaarutitut eqqarsaataapput takornariallu qanoq pissusilersortarnissaannut oqallinnermut aallarnisaatissatut eqqarsaataallutik.

- Kalaallit Nunaata avannaani takornarianut pilerinartorsuarnik peqarpugut aamma umiarsuarsuarnik takornariat ajunngitsup tungaatigut suliniuteqarfigisinnaavavut. Matumani pingaaruteqarpoq maani najugallit soqutigineqanngitsutut misigisimannginnissaat pinngortitallu innarlerneqannginnissaa, Kirsten Strandgaard oqarpoq.

Takornarianut ‘inatsisit qulit’ inooqatigiinnermut tunngasuullutillu Avannaani takornarianut siunnersuutaapput. Assersuutigalugu inatsisit pingajuat ima allassimavoq: inuit naapitatit oqaluuserinagit oqaloqatigikkit” aamma inatsisit arfineq aappaat ima allassimavoq: “asimut eqqagassanik qimatsinngisaannarit – equutikut ujaqqap qaanut ikuallaguk”.

Takornarianut inatsisit qulit KNR-ip nittartagaani knr.gl-imi atuarneqarsinnaapput.