Takornarnianik qimussiussisartut qimmiminnik paarsilluartarput

februaarip 14-at 2007 05:48

Takornarnianik qimussiussisartut qimmiminnik paarsinerlunneq ajorput, Nunatsinni Takornariaqarnermi Inuussutissarsiornermilu Siunnersuisoqatigiinni pisortaaneq, Stig Rømer Winther, taama oqarpoq.

Nunatsinni qimuttut paarinerlunneqarnerartarnerisa nunarsuatsinnut siaruarneqarnera, pisortaanerup assut uggoraa, isumaqarpormi qimminik paarsinerluttut ikinnerussuteqartut.

- Qimuttunik piginnittut amerlanersaat paarsilluartuupput, taakkuullutilli qimmiminnik paarsinerluttunit ikinnerussuteqangaartunit innarligaasut, Stig Rømer Winther oqarpoq.

Nunatsinni Takornariaqarnermi Inuussutissarsiornermilu Siunnersuisoqatigiit nalunngilaat aalisartutut piniartutullu inuussutissarsiuteqartut saniatigooralugu qimussiussisartut amerlanersaasa qimmitik paarilluaraat.

-Ilulissani qimminik paarsinerluttarnermik akiuiniarluni suliniutaalersoq allani aamma peqqunaqaaq, qimuttunimmi paarsilluartutut ilisimaneqalissagaanni, susassaqartut arlallit akuliuttariaqarput, Stig Rømer Winther kajumissaarivoq.

Takornarniat amerliartuinnartut qimussiunneqarnissartik siunertaralugu nunatsinnukartarput. Taamaattumik Nunatsinni Takornariaqarnermi Inuussutissarsiornermilu Siunnersuisoqatigiit takornarnianik qimussiussisartunik pikkorissartitsinitik ingerlattuassallugit ilanngullugu oqaatigaat.