Takornariussisimasut attaveqarfigineqartussanngorput

Umiarsuaq takornarianik angallassisoq gummibådinillu iluliarsuit akornanni tallimanngormat angalatitsisimasoq, navianartorsiortitsisimasutut nalilerlugu Nunatsinni Takornariaqarnermi Inuussutissarsiornermilu Siunnersuisoqatigiinnit attaveqarfigineqartussanngorpoq.

- Ilulissani iluliarsuit akornanni gummibådinik tallimanngormat takornariussisimaneq inuit inuunerannik navianartorsiortitsinerummat akuerisinnaanngilarput, tamannalu umiarsuarmik piginnittunut anngutissavarput. Nunatsinni Takornariaqarnermi Inuussutissarsiornermilu Siunnersuisoqatigiinni paasissutissiinermut ataqatigiissaarisoq Malik Milfeldt oqarpoq.

Malik Milfeldt oqarpoq, Ilulissani takornariartitsivik Destination Disko peqatigalugu umiarsuarmik piginnittunut attaveqassallutik, gummibådinik angallassisoqarneranik takunnittunut Destination Disko ilaasimammat.

- Gummibådit Zodiac-itut ittut atorlugit iluliarsuarnut qanillilluni angallassisoqannginnissaanik internetikkut nittartakkatsinni paasisitsiaareeraluarpugut, taamatuttaaq umiarsuarnut takornarianik angallassisunut ilitsisuummi erseqqissaateqareeraluarluta. Paasisitsiniutit apuunnissaat qulakkeerniarlugu iliuusaasinnaasunik allanik aamma isumaliuteqarpugut. Malik Milfeldt nassuiaavoq.

Paasititsiniutinut aamma ilaasimavoq, gummibådinik iluliarsuit akornanni angallassisoqarnerani ilulissap assakarnerata kingunerisaanik ajutoortoqarsimanera, taamaattumillu gummibådinik angallassisarnerit inassutiginartinneqanngitsut.

- Ilitsersuutinut aamma ilaavoq, umiarsuaq qimallugu angallassisoqassatillugu, soorlu iluliarsuit akornannut, ilisimannittunik aquttoqartarnissaa imaluunnit takornariartitsiviit allaffeqarfiinut saaffiginnittarnissaat. Malik Milfeldt nassuiaavoq.

Ukiuni kingullerni maluginiarneqarsimavortaaq, umiarsuit takornarianik angallassisut gummibådinik navianartumik angallassiniartarnerat, tamannalu takornarianik sullissisut akornanni ajornartorsiutaaleraluttuinnartutut nalilerneqartoq, iliuuseqartoqartariaqartorlu.

- Ajunaartoqarnissaa kissaatiginanngeqaaq, takornariartitsivinnut minnerunngitsumillu nunatsinni takornariaqarnermut ajoqutaasinnaammat. Taamaattumik gummibådinik angallassisarnerit inassutiginatigit tamaviaarluta paasisitsiniutigisarparput. Malik Milfeldt oqarpoq.

Nunatsinni Takornariaqarnermi Inuussutissarsiornermilu Siunnersuisoqatigiit ilitsersuutinik ukiut tamaasa saqqummersitsillutillu umiarsuaatileqatigiinnut nassiussisarput.