Takornarissat akileraarutaat qaffassaput

Siunnersuut ilimagisatut akuerineqarpat, takornarissat ukiumut 24.000-it missaanniittartut tamarmik 525 koruuninik Nunatta karsianut akiliissapput. Taava Nunatta Karsia 1,9 mio. koruuninik isertitaqarnerussaaq.

Akileraarummik qaffaanermut atatillugu nunap immikkoortuini inuussutissarsiutinik ineriartortitsinermut aningaasaliissutit qaffanneqassasut eqqarsaataavoq. Nunatsinni Takornariaqarnermi Inuussutissarsiornermilu Siunnersuisoqatigiinneersup Anders La Cour Vahl-ip tamanna iluaraa, umiarsuarni takornariat atugaasa pitsaanerulernissaat pisariaqaqisoq unnerpaa.

Soorlu Kangerlussuarmi umiarsuit tulassinnaanngillat, takornariat nassataallu umiarsuarniit puttasunut mikisunut aserfallassimasunullu ikaassuunneqartarput, Anders La Cour Vahl oqarpoq.

- Aamma Qaqortumi, Nuummi Ilulissanilu pisariaqartitsipput. Umiarsuarsuit angisuut ilaat Nuumut tulassinnaagaluarput, kisianni amerlanerit kisaqqasarput, ilaasutillu ikaassuuttarlugit, Anders La Cour Vahl oqarpoq.

- Utoqqaat umiarsuarmut ikaarnissaminnut ilaatigut sivisujaarsuarmik utaqqisariaqartarput. Aamma umiarsualiviit arlallit perusuersartarfeqanngillat, takornariallu tamakkua nuanniigusuutigisarpaat.

Umiarsualiviit pitsanngorsarneqanngippata, takornariat umiarsuarniit niusartut ikigaluttuinnassasut Nunatsinni Takornariaqarnermi Inuussutissarsiornermilu Siunnersuisoqatigiinneersup Anders La Cour Vahl-ip aarleqqutigaa.