Takornariat tyskit 29-t bussit Portugalimi feeriartarfimmi ajutoormata ajunaartut
Portugalip qeqertaani Madeirami bussit ajutoormata inuit 29-t ajunaarput.
Ilaatigut Portugalimi radiokkut nutaarsiassaqartitsivik Lusa taama allappoq.
- Pisoq oqaasertalersinnaanngilara, oqaluttuarisinnaanagulu.
- Inuit qanoq naalliussimanersut takorlooruminaatsippakka, sumiiffimmi borgmesteri Filipe Sousa oqarpoq.
Taassuma ilanngullugu oqaatigaa ajunaartut tamarmik Tysklandimeersuusut.
Danmarkimi nunanut allanut ministereqarfiup innuttaasunut sullissiviata bussip ajutoornerani danskinik ajunaartoqarsimanngitsoq pingasunngormat unnukkut nalunaarutigaa.
Bussini ilaasut katillugit 55-iusut, borgmesterip Filipe Sousap ilisimatitsissutigaa.
Bussit Madeirap illoqarfiisa pingaarnersaata kangisissuatigut Funchalikkut ingerlaartillutik innaarsukkut nakkartut, borgmesteri oqarpoq.
Unnukkut ajutoornerup nalaani silagittoq, innuttaasut oqarput. Bussit sooq ajutoornersut oqartussanit misissorneqaleruttorpoq.
Tyskit tusagassiuutaat Bild naapertorlugu, angutit 17-it arnallu aqqaneq-marluk ajunaartut, oqartussat nalunaarutigaat.