Takornariat tikittussat ikileriassapput
Nunatsinnut takornariaqarneq ukiormanna annikinneruvoq. Kisitsisit takutippaat takornariat ikilisimasut. Umiarsuit nunatsinnut takornarianik angallassisartut aamma ikilipput. Taamaakkaluartoq takornariaqartitsinermi sullissisut arriitsumik takornariaqarneq qaffakkiartortoq oqaatigaat.
Nunatsinnut takornariat affai sinnerlugit umiarsuit takornariaatinut ilaallutik tikittarput. Ukiormannali umiarsuit takornariaatit tikittussat ukiut siuliiniit ikinnerussapput, tamakkiisumik takornariat tikittussat eqqorlugit.
Kalaallit Nunaanni takornariaqarnermi inuussutissarsiornermullu siunnersuisoqatigiit GTE malillugu ukiuni qulini kingullerni takornariat amerlassusaat taamaaginnarput. Qaffakkiartorput kisiannili ukiuni tamani assigiinngitsunik amerlassuseqartarlutik.
- Umiarsuit sinersortaatsit tikittussat ikileriarput, taamaakkaluartoq ilaasuisa amerlassusaat taamaaginnarput. Imaakkami umiarsuit ikiligaluarlutik angissusaat alleriarsimammata naatsorsuutigaarput amerlassusaat siornatut 30.000-it missaaniinnissasut. Uanilu eqqugaanerpaassapput, umiarsuit mikinerusut tikittussat ikilisimammata, taamaalillunilu illoqarfiit mikinerusut nunaqarfiillu malugissavaat sinersortaassuit ikilisimaneri, Kalaallit Nunaanni takornariaqarnermut inuussutissarsiornermullu siunnersuisoqatigiinni GTE-mi siunnersortaaneq Mads Skifte oqarpoq.
Umiarsuit ikiligaluartut annerulersimanerisa kinguneraa umiarsuit takornariartaatit ilaasuisa amerlassusaat nikissimanngitsut.
Umiarsuit ikileriarneranut pissutaatinneqarpoq takornariartaatileqatigiit aasami angalasarneq sivikillisissimammassuk.
- Ornitassat "tuniuminarnerusut" maannakkut takornarianut tunineqarnerusarput, akilu apeqqutaatinneqartarpoq ukiut aningaasanik ajalusoorfiusut kingunerisaanik. Sulimi takornarissat aningaasanik amerlasuunik atuerusunngillat, Mads Skifte GTE-meersoq oqarpoq.
Ukiormanna takornariat Kujataani Nuummilu ikinnerulersut Ilulissani amerlisimapput.
Kangerlussuarmilu aamma amerlisimapput - amerlinerallu peqqutaapput timmisartorlutik takornariartartut.
- Takornariaqarneq tamakkerlugu isigissagaanni ukiuunerani aasaaneranilu takornariat amerlanerulertut takussutissaqarpoq. Aasamullu tikittussat amerlanerunissaat naatsorsuutigaarput. Amerlaneruleraluartut umiarsuit takornariartaatsit tikittussat ikinnerussasut takusinnaavakka, Kangerlussuarmi takornarianik sullissivimmi World of Greenlandimi ulluinnarni aqutsisoq Jørgen Larsen oqarpoq.
Kalaallit Nunaanni takornariaqarnermut inuussutissarsiornermullu siunnersuisoqatigiit takornariat ukiup tulliani amerlanerussasut naatsorsuutigaat.
Takornariat timmisartorlutik tikittartut ukiuni kingullerni ikiliartorput, sulilu ikiliartortut Nunatsinni Takornariaqarnermi Inuussutissarsiornermilu Siunnersuisoqatigiinnit oqaatigineqarpoq.
