Takornariat susassaqartinneqarnerusariaqarput

Takornariartartut amerleriaateqarsimasut Kalaallit Nunaanni Naatsorsueqqissaartarfiup kisitsisaataani 2006-imeersuni saqqummiunneqaqqammersuni erserpoq.

Umiarsuarsuit takornarianik angallassisut nunatsinnut tikittartut amerliartuinnartillugit takornariat amerliartuinnartut aamma tikittalersimapput. Siorna 22.000-it missaanni tikissimapput ukiup siuliinut naleqqiullugit 6.000-inik amerlanerullutik.

Takornariat unnuisartut aamma naatsorsorneqarmata 30.000-inik amerleriaateqarsimapput, matumanilu nunatta qeqqani amerleriaateqarsimanerat maluginiarneqarpoq. Aammali amerliartuinnartut ulluni amerlanerusuni unnuisalersimapput. taamatuttaaq nunaqavissut unnuisarfinni unnuisarnerat kisitsisini ilanngunneqarsimapput.

Kisitsisit misissuataaraanni maluginiagassat aamma ilagaat, Tunumut ulluinnarlugu takornariartartut amerliartuinnartut, siorna 2.000-it tungaannut amerlassuseqarsimallutik.

- Tunumulli takornariartartut tassaapput, Islandimiut aaqqissugaannik ulluinnarlugu tikittartut. Destination Eastgreenlandimi, tassalu Tunumi takornariaqarnermut pisortaq Anders Stenbakken erseqqissaavoq.

Takornariat aningaasanik qanoq amerlatigisunik atuisarnerat misissukkanut aamma ilaavoq, paasineqarporlu, ullup unnuallu ingerlanerani nerisassanut, takornariarnernut assigisaannullu katillugit 500 koruunit atortarsimagaat. Taakkunani timmisartukkut billetsit hotelinilu unnuinerit ilanngunneqarsimanngillat.

Takornariat nunatsinniinnerminni misigisartakkatik qanoq isumaqarfigineraat aamma apeqqutigineqarsimavoq. Tamangajammik pinngortitamik kusaginnipput, aammali kulturi, uumasut, oqaluttuarisaaneq, sila inuillu alutornarluinnartutut taaneqarsimapput.

Misigisassanilli nutaanik ujartuisoqarpoq, soorlu nunatsinni ornitassat amerlanerulernissaat kissaatigineqartoq minnerunngitsumillu piffissami allaanerusukkut tikeqqissinnaanissaq taaneqarsimasoq.

Sullinneqarneq unnuisarfiillu naammaginartutut amerlangaatsiartunit nalilerneqarsimapput.

Misissuinermut atatillugu apeqqusiat takornarianut tunniunneqartarsimapput takornariallu 4.000-it 6.000-illu akornanniittut akisimapput.