Takornariat pisuttuarfissaannik nalunaarsuipput
Inuusuttut qulit Europami tamaneersut sapaatip-akunnerani uani Ilulissani takornariat pisuttuarfissaannik pingasunik nalunaarsuileruttorput.
Pisuttuarfissaq ataaseq takornarianut nutaajuvoq, taanna kilometerimik ataatsimik takitigisoq innuttaasut qangalili pisuttuarfigisarpaat.
Pisuttuarfissat nalunaaqutsersukkat marluk katillutik 10 kilometerinik isorartussusillit nungullarsimaqisut nutarterneqarput. Naja Habermann-ip, Ilulissat Kommuneanni pinngortitamut siunnersortaasup inuusuttut qulit Mellemfolkelig Samvirke aqqutigalugu Ilulissaniittut suleqatigai.
Eqqakkat sanaartornermut atortut puiaasaaqqallu imaqanngitsut aqqutaaniittut aamma katersorneqarput.
Pinngortitamut siunnersorti neriuppoq, siunissami ukiut tamaasa pisuttuarfiit kommunemit salinneqatalerumaartut.
Takornariat pinngortitaq minguitsoq takuniarlugu tikittartut pakatsisinniarnagit.
Inuusuttut qulit Europami tamaneersut Mellemfolkeligt Samvirke aqqutigalugu Nunatsinniittut Saqqap 250-liinerata nalaani sullissisimapput, Saqqaq Midnight Sun festivalimullu peqataasimallutik.