Takornariat pillugit iliuusissanik suliniartoqalerpoq
Nunatsinni ilinniarneqarsinnaasut tamarmiulissapput ilinniagaq nutaaq aallartippat.
Ilinniarfimmi pisortaq, Henrik Ebbe Nielsen, ilinniagaq nutaaq pillugu taama oqarpoq.
”Kiffartuussinermik aningaasaqarnikkullu ingerlatsineq takornariaqarnermik aqutsineq qitiutillugu”, sivikinnerusumik ilinniagaqarluni ingerlaqqiffik. Ilinniagaqaq nutaaq Qaqortumi Niuernermik Ilinniarfimmit ingerlanneqartassaaq. Qaffasinnerusumik ilinniaqarsinnaanerup saniatigut ilinniagaq nutaaq taanna nunat tamat akornanni ilinniartitsissutitut akuerisaavoq.
Takornariaqarnermik nunatsinni ilinniartitsisarneq ukiuni kingullerni ingerlajunnaarsimagaluarpoq, takornariaqarnerullu ukiuni kingullerni qaffakkiartupiloornerata pisariaqalersissimavaa takornarialerinermik atuartitseriaatsimik nutaamik aallartitsisoqarnissaa.
Henrik Ebbe Nielsenip ilimagaa, takornarialerinermik ilinniagallit nutaat aallartittussat, kiffartuussinermik aningaasaqarnikkullu ingerlatsinermik ilinniagaqareerlutik naammassiumaartussat, takornariaqarnermik kiffartuussivinni tamani suliffissarsiumaartut:
- Takornarialerinermik ilinniartitsineq sapinngisamik eqaatsunngorlugu suliariniarparput, taamaalillutik ilinniartuutigut naammassisussat takornariartitsivinni mikinerusuni illoqarfinnilu mikisuni soorlu ataatsimik marlunnik sulisulinni ingerlatsisunngorsinnaassammata, soorunami aamma suliffinni anginerusuni soorlu qulinik, 20-nik aamma 30-nik sulisulinni sulilersinnaassapput.
Qinnuteqartunit 22-usunit, qulit ilinniartussatut KVU-mi ukioq manna tiguneqarsimapput, ilinnialersussat Qaqortumi aggustip ulluisa 27-anni aallartissapput. Ilinniarfik ilinniartunik 14-inik ilinniartuuteqarsinnaavoq, ilinniartussat amerlanerusinnaagaluarput ilinniartunut inissaqarniarneq ajornartorsiutaanngikkaluarpat.
