Takornariat naannunniartalissapput

Takornarianut tammajuitsussarsiniartitsilluni nannunniartitsisalernissaq Piniarnermut Pisortaqarfiup piareersarlugu aallartippaa. Takornariartitsiviit isumalluarput, nannunniartitsisalernissarlu piniartunut iluaqutaassasoq Illoqqortoormiuni piniartoq Hjalmer Hammeken oqarpoq:

- Piareersimavunga takornarianik nannunniartitsisalernissamut. Qangali taamaaliortitsisalernissaq Naalakkersuisunut saaffiginnissutigisarakku, Hjalmar Hammeken oqarpoq.

Takornariat tammajuitsussarsiorlutik nannunniartinneqaralernissaat anguniarlugu Namminersornerullutik Oqartussat maleruagassamik sanallutik aallartissimasut, piniarnermut pisortaqarfimmi allaffimmi pisortap Ole Heinrich-ip oqaatigaa. Nannunniartitsisalernissamut maleruagassaq juulip aallaqqaataani naammassineqarsinnaanera pisinnaassasoq piniarnermut pisortaqarfimmit oqaatgineqarpoq.

Tammajuitsussatut naannuttassat qanoq amerlatigissanersut suli oqaatigineqarsinnaanngilaq, nungutaasaanngitsumilli ingerlanneqassasoq Ole Heinrich-ip naatsorsuutigeqquaa.

Greenland Tourism-mi takornariaqarnermi suliniutinilu siunnersuisoq Mads Skifte oqarpoq takornarianut tammajuitsussatut nannunniartitsisalernissami pingaaruteqartoq takornariat naammagisimaarinninnissaat.

- Pingaartorujussuuvoq takornariamut neriorsuutigineqarsimasut tunniunnissaat. Takornariat nannunniartinneqartalernissaat pillugu Qaanaami piniartut pikkorissartinneqassaapput, aammalu takornarianut paasisitsiniaassaagut taamatut nannunniartarneq nungusaataanngitsoq, Mads Skifte oqarpoq.