Takornariat Kalaallit Nunaannukartartut ikinnerulersimapput

Nunarsuarmi tamarmi aningaasarsiornikkut ajalusoornerup kinguneranik, inuit aningaasaatikinnerulerput tamaattumillu angerlarsimanissartik toqqartarlugu.

Kalaallit Nunaanni aamma tamanna malunniuppoq. Kalaallit Nunaanni unnuisarfinni siorna unnuisut 12.000-inik ikileriarput.

Aamma takornariat timmisartumik angalasut ikileriarput, siornamut naleqqiullugit 14.500-nik ikileriarlutik.

Takornariat umiarsuarnik takornariartaatinik ilaallutik angalasut aamma ikileriarput, siornamut naleqqiullugit ukiormanna 2.000-nik ikileriarsimallutik. Takornariat umiarsuarnut takornariartaatinik ilaallutik nunatsinnukartut inuiaqatigiit aningaasarsiornerannut suli pingaaruteqarput, umiarsuarsuit takornarianik angallassisut siorna 32-t tikissimapput, sinerissami umarsualiviit 105-eriarlutik taliffigineqarsimallutik.

Takornariat amerlanersaat tassaajuarput danskit tamannalu naatsorsueqqissaartarfiup maluginiarpaa taamaakkaluartoq amerlassusii procentinngorlugit ikinnerugaluartut.

Kisitsisit kingulliit saqqummiunneqartut takutippaat, takornariat nunanit allaneersut Kalaallit Nunaannut soqutiginninnerat annertunerulersimasoq. Tassuunatigut takornariartitsisartut nuna ataasiinnaq kisiat isumalluutigiunnaarpaat, Kalaallit Nunaanni naatsorsueqqissaartarfik allappoq.