Takornariat iluamik periarfissinneqanngitsut

Umiarsuit takornariartaatit nunatsinnut tikeraleruttorput. Takornariat nunamut niugaangamik nerrivinni tuniniaaveeqqani nioqqutissanik piserusuttannguatsiarput.

Umiarsuaq takornariartaat Deutchland Nuup avataanut tallimanngornermi ullaakkut kisarpoq. Takornariat aningaasaatilippassuit tuniniaasut nioqqutitaannik piserususimanerlutik?

Tuniniaaveeqqani marlunni nioqqutissanik tuniniaasut ullaaq nalunaaqutaq arfineq-pingasunulli nioqqutissaatiminnik tuniniaalersut takornariat nunamiimmata tunisaqarpallaanngillat:

- Takornariat maannamut pisiffiginngilaannga. Suleqatikuma kisimik alakkaraminga pisifigaannga, tuniniaasoq oqarpoq.

Takornarialli nunamut niusimapput tuniniaaveeqqani tuniniarneqartut alakkarnissaannut periarfissaqannginnamik amerlanerit bussit utaqqisut ikiffigeriarlugit illoqarfimmi angallanneqarput.

Nuummi takornariartitsisartut pisortaat Flemming Nicolaisen aperaarput takornariat tuniniaaveeqqani nioqqutissanik misissuinissaannut sooq periarfiisimannginnersut, ima akivoq:

- Umiarsuit takornariartaatit takutitassamittut pilersaarusiarisartagaat assigiinngitsorujussuusarput. Uuma takornariartaatip pilersaarutigisimavai illoqarfimmi takusassarsiornissaq tikaagullinnillu umiatsiaaqqamiit isiginnaarnissaq. Flemming Nicolaisen oqarpoq.

Stig-i sukkuaqqanik tuniniaasoq tunniutiinnarusunngilaq:

- Tuniniaaveeqqagut illoqarfiup qeqqanut nuunnialersaarpagut. Takornariat illoqarfimmi takusassarsiornerminni pisiffiginerussappatigut siunissami illoqarfiup qeqqani tuniniaasalissaagut. Nuutoqqami tuniniaasoq Stig-i oqarpoq.