Takornariat ikiliartorput
Takornariat ikiliartorput. Maannalu Kalaallit Nunaanni Inuussutissarsiornermi Takornariartitsinermilu Siunnersuisoqatigiinnit takornariartitsisartut oqaloqatigerusulerpaat - naalakkersuinermik
suliaqartut aamma ilanngunneqaratarsinnaapput.
Kalaallit Nunaanni Inuussutissarsiornermi Takornariartitsinermilu Siunnersuisoqatigiit GTE-p siulersuisuisa ernumassutigilerpaat takornariartut 2010-mi suli ikinnerulernissaat.
Ukioq mannami takornariat 12 procentinik ikiliareersimanissaat naatsorsuutigineqarpoq, taamaasilluni takornariartut 7000-inik ikileriassallutik.
Umiarsuarnut ilaasartaassuarnut ilaallutik takornariartut ukioq manna siornatut amerlatiginissaat ilimagineqarpoq, tassa 30.000-ingajaat umiarsuarnut ilaallutik sinersussangatinneqarlutik.
2010-mili ilaasartaatiutillit soqutiginninnerat annikinneruvoq.
Pissutsillu taama innerisa GTE-mi siulersuisut ernumatilerpaat, isumaqarpullu nunatsinni takornariartitsisartunik oqaloqateqarnissaq isumasiuinissarlu pisariaqalersimasoq, isummanillu nutaanik ujartuipput.
GTE-mi Pisortaanerup Thomas Rosenkrandsip imaa oqaatigaa:
Maanna danskit nittartagaat takornariarpassuarnut apuuttartut aqqutigalugit Kalaallit Nunaanni takornariartitsisartut nittartaagaat qanoq iserfigineqarsinnaanersut pillugit takoqqusaariniarpugut, taamaasilluni angalaniartut nunatsinni takornariarfiusinnaasunik takusaqarlutillu pisisinnaaleqqullugit.
Apeqqutaanerpaavoq tusaamaneqarneq nittartakkatigullu ilisimaneqarnerulernissaq, tassami saqqumilaarutigisinnaasavut amerlanngitsullu iluaqutiginiartariaqarpavut.
Thomas Rosenkrands aperaara maanna naalakkersuinermik suliaqartut oqartussaaffeqartullu oqaloqatiginissaanut periarfissarsiornersut.
Taamaaqqisaanngikkaluarpoq, tassami Naalakkersuisuusimasut takornariartitsinerup ineriartornissaannut periusissatut ungaluliaat 2008-miit 2010-ip tungaanut najoqqutaasussaq atorallassavarput.
Uanilu oqaloqatigiinissami perioussissatsinni aallaviussapput, taamaattorli paasinarsissappat Naalakkersuisut ikkuteqammersut oqaloqateqarnermi ilannguneqarnissaat pisariaqartoq, soorunami ilaatittariaqassavavut.
Vestnorden Travel Mart 16. aamma 17. september Københavnimi ingerlanneqartussaavoq.
GTE-llu takornariartitsisartunik isumasiuinissaa
Oktobarimi ingerlanneqassangatinneqarpoq.
