Takornariat arfanniarnernik aagasattunik isiginnaariaannaapput
Taamaattoqarpat Nunarput nunani tamalaani tusagassiuutitigut pitsaanngitsumik allaaserneqalersinnaavoq, soorlu Norgip imartaani arfanniarlutik qamutilittut takornarianit isiginnaarneqarmata taama pisoqartoq.
Kommunit imartanik arfernik takornariarfiusinnaasunik immikkoortitsisinnaanngorlugit, Naalakkersuisut juulip 20-ani nalunaarusiorput. Imartat taakkua arfanniarfiussanngillat. Kisianni kommunit sisamat tamarmik KNR-imut oqarput, ileqqoreqqusamik taamaattumik suli naammassisaqaratik.
- Naalakkersuisut ilisimaareqqinnaarpaat, ileqqoreqqusaliussagaanni, piffissami taama sivikitsigisumi naammassineqarsinnaangitsoq, Qaasuitsup Kommuniani borgmesteri Jess Svane oqarpoq.
Taamaammat takornariat arfanniarnermik aattaqartumik isiginnaariaannaapput.
- Taamaammat tamakkua pinngitsoortinniarlugit oqaatigaarput, takornariartitseqatigiiffiit arfanniartussallu peqatigalugit, ileqqoreqqusap peqqissaartumik suliarinissaa pingaartikkipput, borgmesteri oqarpoq.
Imartami ataatsimi arfanniartoqarlunilu arfernik takornariartoqarpat, tamanna nunani tamalaani pitsaanngitsumik allaanerineqarnermik kinguneqarsinnaavoq.
BBC News ukiut sisamat qaangiuttut Norgep avannaani pisimasumik allaaserisaqarpoq. Taamani arfernik takornariat tuluit hollandimiut arfanniut qamutilittoq isiginnaaramikku quarsaaqqasimaqaat.
- Aak sitsiuppoq, isiginnaarlugulu tujorminaqaaq. Arfernik isinnaarniarluta avalakkata taamaattumik isiginnaassalluta takorluunngivikkaluarparput, hollandimiu takornariaq BBC Newsimut taamani oqarpoq.
Takornarialli arfanniartunik takunissaat Jess Svanep qularaa:
- Takornariartitsisartut arfernik takutitsinianeq sissami ingerlannerusalernikuuaat. Tikaagullinniarneq tikaagulliusaarniarnerlu avasinnerusumi aammalu inoqarfinniit ungasinnerusumi pikkajunnerusarput. Taamaattumik imatut aammik takutitsiviusorsuarmik pisinnaanissaa qularaara, Jess Svane oqarpoq.