Takornariat amerligaluttuinnarput
Takornariat Avannaarsuanut takornariarusuttarput, takornariallu Kalaallit Nunaannut, Island-mut, Savalimminullu allaallu Shetland-ip qeqertaanut takornariarusuttartut amerliartorput.
Nunat avannarliit killiit takornariartitsinermut ataatimiisitaliaata pisortaasa tamanna ullumikkut Travel Mart-mi ataatsimeersuarnermi uppernarsarpaat.
Isumalluartoqaqaaq, uulialli akia qaffakkaluattuinnassappat takornariartitsisarneq ajutoorsinnaavoq.
Takornariaqarnermi Inuussutissarsiornermilu Siunnersuisoqatigiit pisortaat Stig Rømer Winther oqarpoq Kalaallit Nunaanni takornariat amerleriarujussuarsimasut. Maannakkumut kisitsisaagallartut takutippaat procentit 10-it 15-illu akornanni takornariaqarneq ukioq manna qaffariarsimasoq.
Takornariartitsinermut tunngasunik suliaqartoq Island-meersoq, Magnús Oddson, aamma isumalluarpoq. Oddson Travel Mart-mi siulersuisuni siulittaasuusoq ukiuni 20-ni Travel Mart-mi peqataasarsimavoq, taannalu oqarpoq Nunanut avannarlernut takornariat ornigunnerusalersimasut.
Siornatigut takornariat siniffissaqartinnissaat kisiat naammattarsimavoq, maannakkulli takornariat piumasaqarneruleriartorput, misigisassaqartinneqartarnissartillu pingaartippaat, paaserusuttarlugulu sunik misigisassaqartinneqarsinnaanerlutik. Magnús Oddson-lu ima oqarpoq:
- Ukiuni kingullerni 20-ni takornariat sammisassaqartinneqartarnissartik pingaartinneruleriartorsimavaat, tamannalu takornarianik sullissisuulluni malunnarpoq. Annilaanngatigineqarsinnaasutut taaneqarsinnaavoq uuliap akitsoraluttuinnarnera, uuliallu akia qaffakkaluttuinnassappat takornariaqarnermut innarliisinnaavoq, Magnús Oddson naggasiivoq.
Magnús Oddson aamma oqarpoq takornariaqartitsinermi aningaasaqarneq apeqqutaatinneqartartoq. Soorlu tyskland-mi aningaasaqarneq ajoraangat inuit angalannginnerusarput. Taammaammat takornariaqarnerunissamik aallussiniaraani nunat ataasiakkaaginnaat samminiarneqarnerusartut oqaaatigaa. Aqagu Travel Mart cirkusbygningimi naggaserneqassaaq.
