Takornariat amerliartorput

juulip 10-at 2007 10:32

Umiarsuarsuarnut ilaallutik nunatsinni illoqarfiit nunaqarfiillu tikillugit takornariat amerliartorput. Ukioq-manna tikittussat siornamut naleqqiullutik 1.500-jangajannik amerleriassasut, GTE-mi ataqatigiissaarisoq Anders la Cour Vahl oqarpoq.

-Takornariartaatinut ilaallutik tikittussatut ilimasaarinerit naapertorlugit tikittussat ukiormannaasiit amerleriaqqissapput. Naatsorsuutigaarput 23.500-t missaanniissasut, tassa siornamut naleqqiullutik 1.000-t 1.500-llu akornannik amerlanerusut, Anders la Cour Vahl oqarpoq.

Takornariat umiarsuarnut ilaallutik tikittartut 1990-ikkunni ukiut ilaanni ikilerialaartaraluarlutik, 2000-ikkut ingerlaneranni amerliartuinnavissimapput.

2007-imi taama amerleriartiginissaannut pissutaaqataavoq, umiarsuaq FRAM, sinerissami illoqarfinnut 70-eriarluni aasap ingerlanerani tikittarnissaminik pilersaaruteqartoq. Taamaalillutik takornariartaatit sinerissami ataasiarlutik arlaleriarlutilluunniit tikinnissaat 210-ussapput.

Illoqarfinnut nunaqarfinnulluunniit tikinneq sissiukkamut tulakkaanni sissiukkalluunniit avataaniikkaanni inummut ataatsimut 450 koruuneqartarpoq. Umiarsualivissinnerinnaq taamaalilluni landskarsimut 10-11 millioni koruuninik isertitsissutaassaaq.

Takornariaq tikiffimmini takusassarsiornernut tammaviutsussanillu pisiniarnernut agguaqatigiissillugu 300 koruuneersimasoq, siorna naatsorsuinerit takutippaat. Ukiormannalu takornariaq ataaseq 400 koruuniissangatinneqarpoq. Tassa katillugit 850 koruunit missaat, aningaasanngorlugit 20 millioni koruunerluinnaat isertitsissutaassallutik.

Anders la Cour Vahl oqarpoq, takornariaqarnermik suliallit tuniniaasartullu umiarsuit tikinnissaannut sissiukkami tikilluaqqusillutillu tuniniaallaqqissiartornerat nunatta isertitaqarnerulerneranut pissutaaqataasoq.

- Aamma nunat allamiut aningaasaasa kortillu akiliutit tigunissaat sumiiffinni takornariaqarfiusuni ilikkariartorneqartoq isertitaqarnerulernermut pissutaavoq, takornariartitsinermik nunatsinni ataqatigiissaarisoq oqarpoq.

Anders la Cour Vahlip aamma takusinnaalereerpaa umiarsuarnut takornariussuarnut ilaallutik aappaagu tikittussat ukiormanna tikittussatut naatsorsuutigisanit amerlanerussasut.