Takornariat allakkajaamik misigisaqarsinnaalerput
Takornariat nutaanik misileerusuttut, allakkajaamik misigisaqarsinnaalerput, tassa 1907-mi Tunumi ilisimasassarsiorlutik angalasimasut, Jørgen Brønlund-ip Mylius Erichsen-ip Høeg Hagen-illu ilisimasassarsiorlutik aqqutigisimasaat malillugu angalaneq takornariat misilissinnaalerpaat. Seriusip nakkutilliisitaani ilaasarsimasoq, takornarianillu angallassisalertussaq Ove Sørensen ima oqarpoq.
- Ilisimasassarsiortitsilluni takornarianik angalatitsisarnissaq, siullermeerlugu aappaagu aggustimiit septembarip tungaanut ingerlanneqaqqaassaaq.
Tunumi ilisimasassarsiorluni angalasarsimanerit inuinnarnit soqutigineqarluartut ilisimaneqalersimavoq, taamaammat isumassarsiatsialaasoraarput, takornarianik taamatut angalatitsisalernissaq, Ove Sørensen oqarpoq.
Tunumi ilisimasassarsiorluni angalasimanersuaq ukioq manna ukiunik hundredenngortorsiorneqarpoq, taamaammallu inuit soqutiginnittorujussuupput.
- Nunatta katersugaasivia suleqatigalugu, sapaatit akunnerini pingasuni eqqaaniaajutigaluni angalaneq ingerlanneqartassaaq, aaqqissuisussallu tassaassapput, Ringkøbing-imi Odderimilu katersugaasiviit, Ove Sørensen oqarpoq, nangillunilu:- Kalaallit Nunaanni nuna eqqissisimatitaq aamma soqutigineqartunut ilaavoq, maannamullu takornariat 45-t angalanissami siullermi inissaqartinneqarput, utaqqisuniittoqarlunilu. Qularnanngitsumik inuit utoqqasaanerulaartut akissallillu angalasarnissarsuarni peqataasassapput. Angalanissani takornariat Island-imut timmisartuunneqaqqaassapput, taassumalu kingorna tunumut angalaneq, umiarsuarmik nanginneqassalluni.
Angalanissami immikkut ilisimasallit arfineq pingasut ilaatinneqassapput, aqqutaanilu misissuilluni assaanerit ingerlanneqartassallutik.
- Brønlundip ilerfata tungaanut angalaneq ingerlanneqariarluni, tunup avannaaniit Svalbardip tungaanut umiarsuarmik angalasoqassaaq.
Angalatitsisartussaq Ove Sørensen, siornatigut Sirius-ip nakkutilliisuini peqataasarsimasoq taama oqarpoq.
Takornariaq ataaseq 53.000 koruuninik akiliilluni peqataasinnaavoq.
