Takornariat aasaanerani saniatigoorilluarneqarsinnaapput
Umiarsuaq takornariartaat "FRAM" quleriarluni aasaq manna Ukkusissanut tikittussaavoq.
Peqatigiiffik "Ukkusissat Tourist Service" 180-inik ilaasortaqartoq,
umiarsuup ataatsip tikinnera naapertorlugu isumaqatigiissuteqareertartut, siulittaasoq Jakob Amossen oqarpoq.
- Aamma siornali isumaqatigiissummi ukioq manna Fram-ip quleriarluni tikinnissaanut aningaasat 180.000 koruunit qulakkeereerpavut, Jakob Amossen naammagisimaarinnilluni radioaviisimut oqarpoq.
Umiarsuarmut tikittumut ataatsimut 18.000 koruuninik Ukkusissat Tourist Service-p pissarsinerata saniatigut, Ukkusissarmiut sanalukkanik assassukkanillu tuniniaasarnermikkut saniatigoorsilluartarput. Kalattoortartut aamma takornarianik kiffartuussisartut outfitter-it aamma aasaarnerani pissarsilluartarnerarpai.
Takornariaqarneq Ukkusissani inuuniutigivinneqarsinnaanerluni?
- Aningaasat amerlagisassaanngillat, kisianni aasaanerani saniatigoorilluarneqarsinnaapput, Jakob Amossen radioaviisimut oqarpoq. Ukkusissat 180-it missaannik inoqarpoq. Fram siullermeerluni 250-it missaannik ilaasoqarluni, junip arfineq aappaanni Ukkusissanut tikissaaq. Umiarsuaq alla Alexander Von Humboldt II 350-it missaannik ilaasoqarluni augustusip 13-ani Ukkusissanut tikissaaq.