Takornariat aningaasaateqarluartut, aalajaassuseq, kiinnallu ilisarnartut piumasaqaatigaat. Taama oqarpoq Nunatsinni takornariaqarnermi inuussutissarsiornermilu siunnersuisoqatigiinni avammut nittarsaassinermi pisortaq, Niels Feerup.
-Angalatitsisut naapittarnerini soorlu maanna USA-mi arlaleriarluta maluginiarsimagipput, angalatitsiniat aalajaassusermik piumasaqaateqarput.
Timmisartukkut attaveqarneq nunamut ornitassamut ajunngitsumik ingerlassaaq. Taamatuttaaq nunap ornitassap iluani timmisartuussineq ajunngitsumik ingerlanissaa angalatitsisartut piumaqaatigisarpaat.
Taamaammat sulinitsinni pingaaruteqarluinnarpoq Air Greenlandip maanna Baltimoremut 2008-mi timmisartuussiinnarnissamik aalajangernera. USA-mimi sulinitsinni maanna oqarsinnaalissaagut ukiup tulliani piffissami uani timmisartuussisoqassaaq. Angalatitsisullu taamaasillutik tatiginerulissavaatigut upperinerulerlutalu, Niels Feerup oqarpoq.
Angalanissamik pilersaarut naammasseriigaq, hotelissat, misigisassarsiornissamik pilersaarutit piariikkat kiisalu nuna pillugu paasissutissat takornarianit piumasarineqartarput.
- Angalatitsisunik angallassineq tuniniaanitsinni atortoraarput aamma, angalatitsisut taamaasillutik namminneq misigisatik angerlarunik pisisartuminnut tuniniarsinnaaniassagamikkit, Niels Feerup taama naggasiivoq.
Nunatta takornariaqarnermut inuussutissarsiornermullu siunnersuisoqatigiivisa aaqqissugaannik Angalatitsisut 54-it tusagassiortullu 108-t ukiup ataatsip ingerlanerani nunarput tikeraarpaat.