Takornariartitsivik matusoq - Naalakkersuisut nalunaaruteqannginnerat isorigaa

Uummannaq Fjord Tours coronavirusip ajornartoortitsinera tamatumalu ilutigisaanik Naalakkersuisut takornarialerinermik inuussutissarsiortunut nalunaaruteqarsimanngimmata matusoq, takornariartitsiviup pisortaa oqarpoq.

Takornariartitsivik anginngitsoq Uummannaq Fjord Tours matuvoq.

Naalakkersuisummi nunatsinnut timmisartumik umiarsuarmillu angallanneq coronavirus ajornartoortitsimmat marsip ulluisa 21-anni inerteqqutigilermassuk takornarianik nunatsinnukartoqarsinnaajunnaarpoq.

AAMMA ATUARUK Coronavirusip ernumassutigineqarnera: Atuarfiit timmisartuussinerillu matulersut

Takornarialerinermik inuussutissarsiutillit takornarianik nunatsinnut qaqugu tikittoqaqqittalernissaanik taamanili nalornilerput. Naalakkersuisummi nunatta avammut matoqqanera qanoq sivisutigissaneranik suli nalunaaruteqanngillat, tamannalu Uummannaq Fjord Toursip qularuterpassuaqarneranik kinguneqarpoq.

- Takornarianik tikittoqassava, tikittoqassanngilaluunniit? Qaqugu ammaqqissaagut? Siunissami pisussat nalorninartuartillugit kaaviiaartitaniillu millioninit amerlanerusunik annaasaqartussanngorallartilluta iliuuseqartariaqarlutalu allamik suliffissarsiortariaqarpugut, Uummannaq Fjord Toursip pisortaa Martin Sørensen oqarpoq.

- Qanoq ingerlariaqqittariaqarnerluta ilisimasimagaluarutsigu iliuuseqarsimasinnaagaluarpugut, Martin Sørensen itisiliivoq.

Nalunaaruteqanngimmata matusoq

Martin Sørensenip kisimiilluni takornariartitsivia 2017-imi aggustip qaammataani ammarpoq, taassumalu umiarsuarmik takornarianik Uummannamut ukiut tamaasa tikittoqaraangat taakku annerusumik sullittarpai.

Assersuutigalugu takornarianik umiatsiamik Uummannap eqqaani angallassisarpoq, takornarianilli Uummannamut siunissami tikittoqaqqippat, Uummannaq Fjord Tourseqassanngilaq.

Naalakkersuisut siunissami pisussanut - takornarianillu ukioq manna tikittoqarsinnaannginneranulluunniit - tunngasunik ersarissumik nalunaaruteqarsimasuuppata, Martin Sørensenip Uummannaq Fjord Tours matusimassanngikkaluarpaa.

- Takornariartitsivimmami uninngatikkallarnissaanik aalajangersimasinnaagaluarpunga, allanillu suliaqarlunga. Nalugakkuli qanoq pisoqassanersoq takornariartitsiviga ammatiinnarsinnaanngilara, Martin Sørensen oqarpoq.

Uummannaq Fjord Tours ikiorsiissutinik Naalakkersuisunit marsip ulluisa 21-anni akuerisanik qinnuteqarlunilu tunineqarpoq.

AAMMA ATUARUK Coronap ajornartorsiortitsinera: Inuussutissarsiutit milliardip affaanik ikiorserpaat

23.000 koruuninik marloriarluni ikiorsiissutisivoq, Martin Sørensenilli oqarnera naapertorlugu taakku takornariartitsiviutimi uninngatikkallarnissaanut naammaqqajanngillat.

- Ikiorsiissutit iluaqutaajuaannarput, 23.000 koruunilli ingerlatsinermut, umiatsianut akisuunut ingerlatsinermilu allanut naafferaanermut naammaqqajanngillat.

KNR-ip inuussutissarsiornermut naalakkersuisoq Jess Svane isornartorsiutinut akissuteqaqqugaluarpaa, taannali apersorneqarnissamut piffissaqartarsimanngilaq.

Isummersuutit