Takornariartitsisut pikkorissartinneqalerput
Illoqqortoormiormiut Nunatsinni Takornariaqarnermi Inuussutissarsiornermilu siunnersuisoqatigiinnit, GTE-miit, ippassarli tikeraarteqalerput.
Takornarianik angallassisartut allallu soqutiginissinnaasut ulluni tulliuttuni periarfissinneqassapput takornarianik kiffartuussinissamut, umiarsuarsuit takornariartaatit pillugit kiisalu angallasseriaatsinik pikkorissarnissaminnut, GTE-mi Inuussutissarsiornermi Siunnersorti Anders la Cour Vahl, nittartakkaminni Inussummi allappoq.
Unnugu aallaqqaasiisoqariarluni, innuttaasut aqagu tallimanngornermi unnukkut ataatsimiitinneqassapput.
Pikkorissartitsinertaa arfininngorpat ulloq naallugu ingerlanneqassaaq, oqaluuserineqassallutik takornariat pisariaqartitaat aamma tikeraartitsillammaat ileqqui.
Takornariat Illoqqortoormiuni amerliartuinnarnerat Radioavisimi juunimi oqaluttuaraarput, ilaatigut qimussimik angalaniartut nunarsuarmit tamaneersut - Japanimit, Sverigemit, New Zealandimeersut, allallu - piniartunut isertitsissutaallualersimanerat eqqaallugu.
Takornariat tammajuitsussarsiorlutik nannunniarnermik ingerlatsilersinnaanerat siunertaralugu pikkorissarnissaminnut piniartut ilaat taamani neqeroorfigineqareerput.
