Takornariartitsisut kalaallit amigaataapput
Takornarianik angallassisinnaasunik Kalaallinik pissarsisinnaaneq, Ilulissani takornariartitsivinnit ajornakusoortinneqarpoq.
Takornariat Nunatsinnukartartut, Ilulissat ornigarnerusarpaat, takornariartitsiviillu Ilulissaniittut paasiniaaviginerani paasinarsivoq, aasaanerani takornarianik angallassisinnaasunik, Kalaallinik sulisussaqarniarneq ajornartorsiutigineqartoq.
Ilulissat Travel-imi takornarianik angallassisartut Danskit tikisinneqartartut 10-it 15-illu akornanniikkajuttarput, Kalaallisullu oqaasilik ataasiinnaasarluni. Aamma Greenland Toursimi Elke Meisnerimit ingerlanneqartumi, assingusumik ingerlasoqartoq oqaatigineqarpoq.
Kalaallit takornarianik angallassisinnaasut amingaatigineqartuarput, soqutiginninnerlu annikeqaaq. Ilulissat Travel allanik marlunnik suleqateqarluni, Ilulissat kommuniat suleqatigalugu takornarianik angallassisartussanik pikkorissaaniarsimagaluarpoq, soqutiginnittulli ikippallaarmata iluatsinngitsoorsimavoq.
Juni-miit aggustip tungaanut aasaanerani takornariat Ilulissanut tikerarnerusarput, amerlanertigullu ilinniartut oqaatsinik arlalinnik ilisimasaqartarmata, aasaanerani takornariartitsivinni angallassisartutut sulisorineqakkajupput, ilinniartulli amerlanerit aasaanerani atuanngiffimminni sulinngiffeqarusunnerusartut, Ilulissat Travel-imi pisortaq Claus Andersen oqarpoq.
Greenland Tourismemi pisortaq Flemming Nicolaisen aammalu Greenland Tours-mi pisortaq Elke Meisner oqarput, aasaanerani takornariaqartarneq ukiuni kingullerni Septembarip qaammataa ilanngullugu takornariarfiusalersoq.
