Takornariartitsineq pillugu suleqatigiittoqarluanngilaq
Nunat avannarliit killiit, tassalu nunarput, Islandi Savalimmiullu takornariaqarneq pillugu suleqatigiinnerminni festernerni oqalugiarnissartik suleqatigiinnerminngarnit salliutinnerusaraat, Nunatsinni Takornariaqarnermi Inuussutissarsiornermilu Siunnersuisoqatigiit pisortaata Stig Rømer Wintherip uparuartuutigaa.
- Nunat avannarliit takornariaqarneq pillugu suleqatigiinneranni suliniaqatigiiffiit amerlavallaarput, tamakkulu suliniaqatigiiffiit ooriuteqanngillat, tassalu imaappoq, ataatsimiinneerarpassuarnut nukiit akueriuminaatsumik atorneqarpallaartarput. Ataatsimiittoqartillugulu pilersaaruterpassuit aningaasassaqartinneqanngitsut isumaqatigiissutaalertarlutik, taama oqarpoq Stig Rømer Winther.
Nunatsinni Takornariaqarnermi Inuussutissarsiornermilu Siunnersuisoqatigiit ukiut qulit ingerlanerini Islandi Savalimmiullu suleqatigalugit takornariaqarneq pillugu pisariinnerusumik suleriuseqarnissamik suliniuteqarniarsarisuupput.
- Akuerisinnaanngilluinnarpara nunatsinniit aningaasarpassuit nukippassuillu suunngitsunut atussagutsigit, Stig Rømer Winther oqarpoq.
Taanna aperaarput, akunnerminni suleqatigiinnerat qanoq innersoq.
- Savalimmiormiut ajunngitsorujussuarmik oqaloqatigilluarsinnaavagut aammami Islandimiut oqaloqatigilluarsinnaagaluarpagut. Kisianni oqarsinnaavunga Islandimiut suleqatigiinnermut nutaanngorsaanissaminnut soqutigisaqanngitsupilussuummata, tamannalu assut uggornartuuvoq, Stig Rømer Winther oqarpoq.
Taassuma suleqatigiinneq siammarniarsarisimagaluarpaa, Shetlandip qeqertai New Foundlandilu allaat tikillugu suleqatiginialersaarlugit, taamaalillugu vikingit oqaluttuarsartaat peqatigiillutik takornariartitsinermi suliniuteqarfiginiarlugu.
Islandip nunattalu akornanni takornariaqarneq pillugu suliniummi Samimmi siusinnerusukkut siulittaasuusimasup Gudmund Thorsteinssonip annilaanngatigaa nunat taakku akornanni suliarujussuarmik pisariinnerusumik suleriuseqarnissamik nassaarniarsaraluni suleqatigiinniarsarinerugaluup ajalusooratarsinnaanera.
Stig Rømer Wintherili taama isumaqanngilaq isumaqarlunili suleqatigiinniarnermi suleriusissamik nassaarniarsarineq suliarujussuunngitsoq akerlianillu annikitsuinnaasoq.
- Suleqatigiinnitsinni annikikkaluannguamik atorsinnaalluartumilli periuseqartuugaluarutta sorpassuit anguneqarsinnaagaluarput, asuli ooriuteqarpiaratalu issiarusaarluta pingaaruteqartorujussuartullu immitsinnut pilluta peruusaarata, Stig Rømer Winther oqarpoq.
Taanna aamma erseqqissaavoq, arlalippassuariarlutik Islandimut suleqatiginninniarlutik siunnersuutiminnik allagaqartarsimagaluarlutik qaqutiguinnarli saaffiginninnitik akissuteqarfigineqartarsimasut.
