Takornariartitsineq ineriartortinniarpaat

Danmarkip nunatsinnut tapiissutaasa ilaannit 50 mio koruunit Namminersornerullutik Oqartussani immikkoortinneqarsimapput ilinniartitaanerup, takornariaqarnerup inuussutissarsiornerullu 2005, 2006 aammalu 2007-mi ineriartortinneqarnissaannut atugassatut.

Aningaasat ilai takornariaqarnermik sullissinerup ineriartorteqqinnissaanut atorneqassapput. Umiarsuarsuit takornarianik ilaasoqarlutik tikittartut pitsaanerusumik ataqatigiinnerusumillu sulinikkut tikilluaqquneqartalernissaat , takornariaqarnermi sulisut tamaasa ataqatigiissumik suleqatigalugit ineriartortinneqassaaq. Qaammatinilu makkunani Aasianni takornariaqarnermi pisortaq Frederik Lundblad nunatsinni angalatinneqarpoq takornariartitsisut pisinnaasai suut ineriartortinneqartariaqarnersut apersuinermigut paasiniaatillugu. Taama oqarpoq Kalaallit Nunaani Takornariaqarnermi Inuussutissarsiornermilu Ineriartortitsinermi pisortaq Hans Peter Poulsen.

- Ineriartortitsinissami piginnaanerit pisinnaasallu suut ineriartortinnissaat pillugu misissueqqissaarnerup nalunaarusiornera apriilimi naammassineqareersimassaaq, taannalu Namminersornerullutik Oqartussanut tunniunneqarpat 2006–mi 2007–milu pikkorissarnerit suut qanorlu aningaasartuuteqassanersugut nalunaarusiorneqarsimassapput, Hans Peter Poulsen oqarpoq.

Takornariaqarnermi Aasianni pisortaq Frederik Lundblad nunarput tamaat angallavigaa, Maniitsoq, Kangerlussuaq, Aasiaat Ilulissallu tikereersimallugit. Nammineq naliliinera naapertorlugu, takornarianik sullissisut inuttut ineriartorneq pillugu pikkorissartinneqartariaqarput.

- Uagut kalaallit ittoortaratta taamanna peertariaqarpoq, tassami takornariamut uagut oqaluttuarisaanerput paasissutissiissutigisariaqarparput, Frederik Lundblad oqarpoq.

Takornariaqarneq pillugu isumasiortitsinissaq ukioq manna siulleq Maniitsumi marsip qaammataani ingerlanneqassaaq.