Takornariartaatit aatsaat taama amerlatigisut Ilimanniassapput

Umiarsuit takornariartaatit aatsaat taama amerlatigisut Ilimanamut aasap ingerlanerani tikinnissaat naatsorsuutigineqarpoq. Umiarsuimmi arfinillit Ilimanap saavani kisartarumaartut pilersaarutaavoq. Umiarsuit ilaasorisinnaasaat katikkaanni 4.300-nik ilaasoqarsinnaapput. Nunaqarfimmullu pingasoriarluni tikittussat ilaat, AIDAcara, 1.200-it tungaanut ilaasoqarsinnaalluni.

Nunaqarfik Ilimanaq, 50-inik innuttaqartoq, aasap ingerlanerani takornariarpassuaqartassaaq, umiarsuit takornariartaatit nunaqarfimmut tikinnissaminnut pilersaartut ilaat, 1200-it pallillugit ilaasoqarsinnaasoq, nunaqarfiup saavani kisarsimaleraangat.

- Pissangavugut qanoq iluaqutaatigissanersoq aningaasat tungaasigut, Ove Villadsen nunaqarfimmiut sinnerlugit takornariartaatit tikittarnissaanni ataqatigiissaarisartussaq oqarpoq.

AAMMA ATUARUK Ilimanaq Europamit Kulturikkut kingornussanut nersornaasigaavoq

Nunaqarfimmi umiarsuarnit takornariartaatinit arfinileriarluni tikinneqartussaavoq. Taakkualu ilaasorisinnaasaat ataatsimut katikkaanni takornariat ikinnerpaamik 4.300 umiarsuit takornariartaatit aqqutigalugit Ilimanamut tikittussaapput.

- Misilinniarparput. Nunaqarfimmiullu ataatsimeeqatigiikkatta taamatut isumaqatigiippugut misilinneqassasoq maani taakkua sullinniarsariniarlugit isumaqatigiippugut, Ove Villadsen oqarpoq.

Nunaqarfimmiut isumasioqatigiisinneqartut

Ilimanarmiullumi umiarsuarnit takornariartaatinit aatsaat taama amerlatigisunit tikinneqarnissaat pillugu Avannaata Kommunianit isumasiorneqarsimapput.

- Uani pingaartiinnarparput ilimanarmiut alloriarnermik ataatsimik siulliussasut takornariat tikinnginneranni, Konrad Seblon, Avannaata Kommuniani takornariaqarnermut ataqatigiissaarisoq, oqarpoq.

Beboerne i bygden er bekymrede for at den voldsomme mængde turister vil slide på naturen, alligevel vil bygden give krydstogtturismen et forsøg. Assi: KNR

Takornarianillu taama amerlatigisunik aatsaat tikinneqarnissaq piareersarneqartussanngorpoq.

- Kisianni isumaqatigiippugut arlaannik sammisassaqartitsisoqassasoq. Kaffillertoqassasoq, pisuttuaassisoqassasoq, aammalu arlaannik piumasoqassappat taava arlaannik sammisassaqartitsisoqassasoq, Ove Villadsen oqarpoq.

World of Greenlandip Ilimanami illuaqqanik ingerlatsivia umiarsuarnit takornarianut annertunerusumik suliaqarneq ajorpoq, kisianni:

- Ataatsimiittarfipput, uagut maani taasartakkanni Pisiniarfitoqqami, tassa ataatsimiittarfik nunaqqatigiinnut neqeroorutigineqarpoq arlaannik sammisaqartitsisoqarusukkuni tappinnga ini akeqanngitsumik aamma atorneqarsinnaasoq, Jacob Nedergård, Ilimanaq Lodge ingerlatsisoq oqarpoq.

Nunap nungullarnissaa ernumagineqartoq

Aammali tikerartussat nunamik nungullarsaasinnaanerat ernummatigineqarpoq.

- Siorna tikittut naatsorsuutigalugit ilaatigut oqaatigineqarami nuna annertuallaamik aserorterneqartoq tummaarineqarluni, Ove Villadsen oqarpoq.

Nunaqarfimmiulli umiarsuarnit takornariartussat sullillugit misilinniarlugit tassa aalajangersimapput.

AAMMA ATUARUK Ilimanami illutoqqat marluk nutarterlugit naammassineqartut

- Kisianni isumaqatigiippugut umiarsuaq kingulleq aallareerpat naapeqqinniarluta, naliliillutalu qanoq angusaqarfiusimanersoq. Iluatsippa? Iluatsinngila? Iluatsinngippat suut aaqqinniartussaassuagut? Taavalu una nalunngilarput umiarsuit nuannisarsimappata naatsorsuutigisinnaavarput aappaagu amerleriaqqissasut. Aamma taanna piareersimaffigissuarput, Konrad Seblon oqarpoq.

Umiarsuaq takornariartaat 1.180-nik ilaasoqarsinnaasoq pilersaarutit malillugit Ilimanamut siullersaalluni juulip 23-ani tikissaaq Ilimanallu eqqaani ullut marluk kisarsimassalluni.

Bygden Ilimanaq ligger syd for mundingen af Ilulissat Isfjord, og modtager normalt turister, der kommer sejlende fra Ilulissat. Assi: KNR

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat