Takornariartaatip kivinera ilungersunarluinnartuusoq

Umiarsuaq takornariartaat 26-nik ilaasoqarluni Ilulissani sapaammi unnuakkut kivivoq. Kivineranut suna pissutaanersoq suli paasiniarneqarpoq, imaanilu ajutoortoqarsimatillugu paasiniaasartut pisimasoq ilungersunarluinnartutut nalilerpaat.
Assi © : Jens V. Nielsen
Allattoq Sara K. Jakobsen
aggustip 15-at 2016 13:42

- Pisimasoq pillugu misissuinerput aallartereerparput kivineranullu qanoq pisoqarsimaneranik paasiniaaleruttorluta, imaani ajutoortoqarsimatillugu paasiniaasartuni pisortaq Øssur Hilduberg KNR-imut oqarpoq.

Ilaasartaat kiviartulertorlu ilaasut tamarmik qimagussortinneqarput, annaassiniaaqataasoq paasissutissiivoq.

- Ilaasartaat tikikkiartorlugu aqua imaanut morsulereersimasoq takuara tassanilu paasilerpara angallat kivilersoq, angallammik attartortittakkamik piginnittoq Jens Ole Thomassen oqarpoq.

Takornarianik ilaasartaatip, 23-nik ilaasoqarluni pingasunillu inuttaqarluni, Ilulissani angallassinera sapaatiummat ullaassakkut ataatsip missaani ajorluinnartumik kinguneqangajappoq.

Angallatillu naalagaata, ilaasartaammut qaninnerusup, unnuap-qeqqanngilaataa ajunaalernermi kalerrisaarut aallakaatinneqartoq raadiukkut tusaalerpaa.

- Ilaasut eqqarsaatigaakka. Inuit ilaasartaammit sukkaannaq kiviartortumit qimagussortinnissaat kisiat eqqarsaatigaara, Jens Ole Thomassen oqarpoq.

Aamma atuaruk Ilulissani ilaasartaat kivivoq - ajoqusertoqanngilaq

Ilaasut angallammut attartortakkamut nuussorneranni ilaasartaatip naalagaa imaaniitilluni annanniut kaanngartinniarsaraa, iluatsinngitsumilli. 

Angallat attartortagaq aqqaneq-marluinnarnik ilaasoqarsinnaagaluarluni ilaasut 26-usut tamarmik assartorsinnaasimavai. 

- Annaassiniaanerup tamaat annerusumik pisoqarfiunngilaq uippallertoqarnanilu, Jens Ole Thomassen oqarpoq.

Qaasuitsup Politiivineersoq Sebastian Bech naapertorlugu ilaasartaat aporsimananilu aporneqarsimanngilaq, sulilu paasniaasoqarmat Ilulissani politiit imaanilu ajutoortoqarsimatillugu paasiniaasartut, Den Maritime Havarikommission, allanik oqaaseqarusinngillat. 

Politiit ajutoorsimanermullu misissuisut suli paasisaqartinnagit Visit Greenlandiminngaanniit ajutoorneq isummersorfigineqarumanngilaq.