Takornariartaatinut ilaasunut akitsuutip atorunnaarsinniarnera IA-p isumaqatiginngilaa

Tamatumunngali aaqqissuutiginiarneqartoq IA-p isumaqatiginngilaa, tassalu umiarsuarnut takornariartaatinut akitsuutip allanngortinneqarnissaa.

Ilaasunut akitsuutip atorunnaarsinneqarnissaanik taarsiullugulu umiarsuit angissusaat ullullu qassit talisimanissaat apeqqutaatillugu talittarfinni akitsuummik eqqussisoqarnissaanik siunnersuut IA-mit isumaqatigineqanngilaq.

Umiarsualivimmiinnermut akitsuusersuinermut ikarsaarnerup killormut sunniuteqarsinnaanera partiip aarleqqutigaa, tassalu nunap immikkoortuini isertitakinnerulerneq, pingaartumik illoqarfinni mikinerusuni nunaqarfinnilu.

- Akitsuutit allatut katiterneqarnissaat uagut kissaatiginartipparput, taamatullu nunatta avammut nittarsaannissaanut 1,6 millionit koruuninik aningaasaliissutaasimagaluartut attatiinnarusuppagut, IA tusagassiorfinnut nalunaarummini taama allappoq.

AAMMA ATUARUK Umiarsuarnut takornariartaatinut ilaasumut akitsuut Naalakkersuisut atorunnaarsinniarpaat

Inuit Ataqatigiit aamma isumaqarput umiarsuit takornariartaatit nunatsinnut tikittartut ikilinerinut ilaasunut akitsuut qaffasissoq kisimi pisuutinneqarsinnaanngitsoq, maannakkorpiarlu takornariaqarnermik sullissisut akornanni imartatsinni sikusartumi angalanerup navianarsinnaanera akisussaaffiullu inissinneqarnissaa pillugit nalornisoqartoq innersuussutigalugu, nalorninerlu taanna Nunatta annertunerusumik nittarsaanneqarneratigut qaangerniarneqarsinnaassanasoraat.

Aammattaaq takornariaqarnermi akitsuutinik apparsaaneq umiarsuarnut takornariartaatinut taamaallaat atuutsinneqarnissaa Inuit Ataqatigiit orniginartinngilaat.
 
Silaannakkut angallannermut atatillugu qangattalernermi minnermilu akitsuutit appartinneqarsinnaanerinik periarfissaqarnersoq misissoqqaartariaqarsoraat. Akitsuutit taakku aningaasartuutillu appartikkaanni nunaqavissunut sinerissamilu inuussutissarsiortunut iluaqutaaginnarani aamma takornarianut nioqqutissiarineqartartut akikinnerulersinneqarsinnaapput ilaatigut mittarfeqarfiit ammasarfiisa avataatigut mittarfinnik atuinerup qanoq aningaasartuutaatigisarnerata misissorneqarneratigut, Inuit Ataqatigiit taama allapput akitsuutillu pillugit politikki pillugu Naalakkersuisut oqaloqatigiumallugit.