Takornariartaat upernaaru Tunumukassaaq

novembarip 09-at 2006 11:02

Norgemiut umiarsuaat takornariartaat nutaarluinnaq maajip qaammataani Tunuliassaaq.

Islandimi Reykjavikimiit umiarsuaq siullermeerluni Tunup tungaanut angalassaaq, norgemiullu angalaqataanissartik kajunngutigigaat, umiarsuaatileqatigiiffiup paasissutissiisartuisa pisortaat nalunaarpoq.

- Avammut saqqummiussigatta sapaatip-akunnera siulleq soqutiginnittoqaqaaq, aviisimut Tromsømut taama paasissutissiisartut pisortaat oqarpoq.

Umiarsuaq 318-inik ilaasoqarsinnaavoq, pisortalli angalaqqaarnermi ilaasussat taama amerlatiginissaat ilimaginngilaa. Taamaattorli 200-usinnaassappata naammagisimaarlugu aamma oqarpoq.

Umiarsuup siullermeersumik angalanerani Tunumut ilaaneq akikinnerpaaq 24.000 koruuningajannik akeqassaaq, akisunerpaarlu 86.000 koruuninik akeqassalluni.