Takornariartaassuaq ataasiinnaq issittup imartaani angalanissamut tulluarsagaavoq
Kalaallit Nunaat Greenland Tourism-ip avammut ussassaartarpaa, umiarsuillumi takornarianik angallassisut 375-eriarlutik illoqarfinnut nunaqarfinnulluunniit aasaru tikittussaapput.
Royal Arctic Linie Agenturip umiarsuit tikittussat ilaat, tassa tulaassinerit 230-t isumagisussaavaat. Sinneri Blue Waterimit isumagineqanngikkaangamik namminneerlutik imminnut isumaginiarlutik nalunaarutigiinnartarpaat.
Gorm Diernisse Royal Arctic Linemeersoq aperaarput umiarsuit tikittussat qassit sikulimmi ilulialimmiluunniit angalanissaminnut tulluarsagaanersut, tassa umiarsuup timitai ninnguninngorlugit sanaajunersut.
-Ilisimasakka malillugit umiarsuaq ataasiinnaq, tassalu M/S Fram, kisimi ninnguninngorlugu tulluarsagaavoq.
-Tamanna qanoq isumaqarpa? Apereqqippara, imalu nassuiaavoq:
-Tassa ilulissamik sikulimmulluunniit qaninaagaqarunik umiarsuit ajunaariaannaassapput.
Aammali Gorm Diernisse oqarpoq, umiarsuit takornarianik angallassisartut tusindtilinnik ilaasullit Kalaallit Nunaanut qaqutigorsuaq annguttartut.
Kalaallit Nunaannullu takornariartartut 100-niit 400-t tikillugit amerlassuseqartarnerarpai.
Ilisimavarpullu umiarsuit tamakkua imaaliallaannaq putoriaannaat ilaatigut Ilulissat Kangianut iluliarsuarnut pulatertartut takuneqartuartartut, imaluunniit iluliarujussuup eqqaanut kisartarlutik.
Tamakkuami isumannaatsumik takornarianik angallassinissaannut qanoq piumaffigisinnaavagut- aperaagut?
-Ullumikkutut itsillugu qulakkeeriniarsinnaanngilagut, tassa piumaffigisinnaanngilavut.
Kalaallit Nunaanni immakkut angallassinerit danskit naalagaaffiata, tassa Søfartsstyrelsep, akisussaaffigai.
Gorm Diernisselu oqarpoq, umiarsuit nunami maani ilisimasalimmik sikusiornissaminnut inuttalersinnaasut. Umiarsuilli affaasa missaasa innersuussut malinneq ajoraat oqaatigaa.
Gorm Diernisse aamma oqarpoq, suleqatigiissitaliortoqarnikuusoq, qulakkeerinnittussamik siunissami nunami maani pissutsinik ilisimasalimmik inuttalerallartarnissamik – nassuerutigaali tamanna piffissami qaninnermi anguneqarsinnaassanngitsoq.
