Takornariartaammi naarluupput

Takornariat umiarsuarmut takornariartaammut MS Fram-imut ilaallutik maanna nunatta sineriaani angalasut nuannisarnerat killilerneqarpoq. Umiarsuarmi ilaasut ikinnerpaamik pingasut sakkortuumik naarlulersimapput taamalu nakorsanit peqqissaasunillu nakkutigineqalerlutik.

Aamma norskit umiarsuaatileqatigiiffiat Hurtigruten, MS Fram-imik piginnittoq naarlunnermik aatsaat ajornartorsiuteqalinngilaq.

TV-qarfik NRK Nordland naapertorlugu qanittukkut umiarsuaatileqatigiiffiup umiarsuaataani umiarsuarni pingasuusuni, Norgip sineriaani angalasuni ilaasut 200-t naarlulersimapput.

Hurtigrutenimi atorfilik Svein Sollid NRK-mut oqarpoq umiarsuaatileqatigiiffiup tuniluunnartumik naarluut pinngitsoorniarlugu umiarsuit eqqiaqqissaarneqarnissaat aamma oqartussaasunik suleqateqarneq isumagigaa.

Norgimi inuussutissanik nakkutilliisut Hurtigrutenip Norgimi umiarsuaataanni imeq misissorsimavaat, naarluunnerullu imermeersuusinnaanera oqaatigisimavaat. Tassami umiarsuarni erngup salinneqarnera pitsaavallaanngitsutut nalilersimavaat. Nakorsaq Glenn Severinsen Tromsø-meersoq umiarsuaatileqatigiiffimmit suleqatigineqartoq NRK-mut oqarpoq, naarluutip tunillaassuuttuunissaa ilimanarnerusoq.