Takornariarpassuit Qaqortumut aggustip 23-ani tikissapput

Qaqortumi innuttat aggustip 23-ani marloriaatinngungajassinnaapput, umiarsuimmi takornariartaatit USA-meersut angisuut marluk Qaqortumut ulloq taanna tikissapput.
Allattoq Mads Lynge
aggustip 01-at 2009 13:47

Umiarsuit marluk tassaapput takornariartaat Maasdam, 1300-nik ilaasoqartoq, kiisalu takornariartaat Tahitian Princess, 700-nik ilaasoqartoq.

Tassa inuit katillugit 2000-it missaat Qaqortumut ulloq taanna tikissapput, Nunatsinnilu Takornariaqarnermi Inuussutissarsiornermilu Siunnersuisoqatigiit, GTE, aamma Qaqortoq Tourist Service Amerikamiunut maanna kissaateqarput, tassa umiarsuit taakku marluk ataatsikkoorlutik tikinnginnissaat kissaatigimmassuk.

Qaqortumulli aggustip 23-ani tikinissartik umiarsuaatileqatigiiffiit taakku marluk attappaat. Umiarsuaatileqatigiiffiit tassaapput Holland America Line aamma Princess Cruises.

Umiarsuarujussuit marluk ataatsikkut tikinnissaat GTE-p qanoq iliuuseqarfigisinnaanngikkaa, Malik Milfeldt GTE-meersoq oqarpoq, umiarsualivinnili sulisut peqatigalugit aaqqiisoqarnissaa siunniunneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq