Takornariarpassuit Nuummiittut

Silagissuup ataani Nuup aqquserngi Japanimiunik ujameriattuinnaapput.
Allattoq Elisa Isaksen
juulip 07-at 2008 17:21

Umiarsuarsuaq takornarianik angallassissut quleriinnik qulingiluanik portussusilik Peace Boat, eqqissinerup umiarsuaa, Japanimiunik takornarianik 960-inik ilaasoqarluni ullaaq Nuummut tikippoq.

Takornariat Kalaallit Nunaannut tikittut Kalaallit Nunaat pillugu nalunngisaat ilisimasaat takorluugaallu tusarusullutigit, umiarsuarmukarpugut naapippagullu inuusuttunnguit Tokyomi universitetimi inatsisilerutuunngorniat.

Tuluttut oqalussinnaanerat killeqarpoq, oqaluttuarusuttorujussuupput, tuluttullu oqaatiginiakkatik naluleraangamikkit Japanimiusut imminnut oqaluuttarput.

Juullip inuanut allakkanut nakkartitsivik nalunngilaat, naapitagullu atisalersorsimapput, ilaat puiseraannguusaarpoq ataaserlu isarukitsuusaarluni.

Kalaallit Nunaat pillugu ilisimasaqarnersut paaserusuttorujussuugaluarparput, nalunngisaalli tassaavoq Juullip inuanut allakkanut nakkartitsivik.

Nuummi Annaassisitta oqaluffiata eqqaani Japanimiut inuusuttut naapitagut Hans Egedep eqqaassutissiaa takuniarsimavaat, takuniagartilli kinaanersoq paasisimagunanngilaat, isikkiviginnerali taanna qularutissaanngitsumik nuannaraat.

Umiarsuarsuaq Japanimiut takornariat ilaaffigisaat Peace Boat eqqissinerup umiarsuaa 960-inik ilaasullik 365-nillu inuttaqartoq majip ulluisa 14-annili Japan-imit Yokohamamit aallarpoq, Vietnam aqqusaarlugu Singapore Jordan Igitsini Tyrkia Greekerit nunaat Italia Spania Frankrig Holland Norge kiisalu Island angallavigereerlugit ullaaq Nuummut tikippoq.

Umiarsuaq takornarianik angallasisartoq takornariartaatinut allanut sanilliullugu allatukkajaaq angalavoq. Takornariat ingerlaarnerminni oqalugiarfigineqartarput ilinniartinneqartarlutillu.

Umiarsuup nunarsuatsinnik kaajallaalluni angalanerani silap pissusaata allanngoriartornera immikkut sammineqarpoq.

Umiarsuaq Japanimiunit pigineqartoq aningaasarsiornikut naalakkersuinikkullu aalajangersimasumik sammiveqartumik suliniuteqartuungilaq, eqqissinissaq inuit pisinnaatitaaffii piujuaannartitsinissarlu siunertaralugu suliniuteqartunit pigineqarpoq.

Umiarsuaq Kalaallit Nunaata tungaanut ingerlaarnerani

Kalaallit Nunaat immikkut sammineqanngilaq takornarianik angallassisartoq New Zealand-imioq Sam Fitzgerald oqaluttuarpoq. Ilaasut ataasiakkaat nammineq piumassusertik aallavigalugu paasisitsinissamik katersuunnermi peqataanissartik aalajangertarpaat,

taamaattumik Japaniumiut takorniarit 965-it ullumi Nuummut tikittut ilaannik Kalaallit Nunaannik ilisimasaqarluartumik naapitsinngitsoorpugut, nalunngilaalli Juullip inuata nunarigaa allakanillu nakkartitsivik takusassat pingarnersarigaat paasivarput.

Umiarsuaq takornarianik angallassisioq Peace Boat unnugu Nuummiit aallaruni New York-imut ingerlaassaaq, tikitassaasalu ilagaat, Venezuela Mexico Canada Alaska, nunarsuarmillu kaajalaaniarnermi angerlamut Japan-mut apuutissapput aggustip ulluisa 15-anni. Angalaneq innummut ataatsimut 15.000 dollarsinik akeqarpoq koruuninngorlugit 70.000 koruuninik akeqarluni. Ullumi umiarsuarsuarmut takornariarnitsinni oqaluttuunneqarpugut ilaasut akornanni utoqqaanersaq 99-inik ukioqartoq nukarlersaallu aqqanilinnik ukioqartoq.

Takornariaq ataaseq Kalaallit Nunaanni takornariartoq, 450 koruuninik akiliisarpoq, ullumilu takornariat 2900-it Nuummut tikipput, taamaatumillu nunatta karsia ullumikkuinnaq 1,3 millioner koruuninik iluanaarpoq.

Umiarsuaq takornarianik angallassisoq USA-meersoq to tusind-inik ilaasoqarluni aamma tikippoq.