Takornariarneq ilungersuanartoq: Sisimiuniit Canadamut qajartualersut
Qaannat nuannaariutit arfineq pingasut Sisimiuniit aappaagu augustip naanerani avalakkumaarput. Ima avalatsigissapput ulluni arlalinni nunamik takusaqarsinnaanaviaratik.
Naatsumik oqaluttuarineqartoq tassaavoq angalaneq tuluttut taaguuteqartinneqartoq ’assisted kayak expedition’ Sisimiuniit Canadami Cap Dyerimut qajartuarnerusussaq.
Isumassarsisoq tassaavoq franskeq Julien Caquineau. Qajartortartoq Maligiaq Padilla, Sisimiuni peroriartortoq, misigisassarsiortuni aqutsisuussaaq.
- Nereqatigiinnermi isumassarsivugut pissanganarsinnaassagaluartoq paasissallugu taama isorartutigisumut qajartuarnissaq soqutigineqassanersoq, Julien Caquineau.
Soqutiginninneq tupaallannartoq
Qaammatip aappaata affap matuma siorna angalanermut nalunaarsinnaaneq tuniniaasartut aqqutigalugit periarfissaalerpoq.
- Ulloq taanna ikkunneqarmat angalaqataaniartunit sianerfigineqarlungalu emailikkut allaffigineqarpunga. Assut tupaallappunga. Tassami suli ukioq ataaseq qaangiuppat aatsaat angalasoqartussaavoq inissanillu arfineq pingasuusunit tallimat tunereerput, Julien Caquineau oqarpoq.
Ukiut aqqaneq marluk matuma siorna Nunatsinnut pivoq qaammat ataaseq missaliorlugu Nunatsinniinniarluni. Ukiulli arlallit Oqaatsuni najugaqarpoq maannalu Sisimiuni najugaqarpoq nunaqavissunik ikinngitsunik ilisarisimasaqarluni.
Maligiaq Padillallu toqqarnera nalaatsornerinnaanngilaq.
- Qajartullaqqissorujussuuvoq. Nunani allani ilisimaneqarpoq misigisassarsiornerit Spaniami Taiwanimi allanilu peqataaffigisarlugit. Assut toqqissisimanarpoq misilittagaqarluartumik angalasut aqutsisoqartussaanerat, Julien Caquineau oqarpoq.
Ullut aqqanillit angalaneq
Baffin Stræde ikaarlugu angalaneq navianaatsuinnaanngilaq. Ullut aqqanillit angalanissaq ilimanarpoq, issittumilu silap allanngoriasaartarnera takornartaanngilaq.
- Una angalaneq peqataasunut ulorianassanngilaq. Aamma taaguutaani ’assisted kayak expedition’mi ersereerpoq. Angallat tissiartaat ’La Louise’ 19 meterisut takitigisoq ingiallortaassaaq tassanilu peqataasut nerisinnaapput, sinissinnaapput uffarsinnaallutillu. Taamaattumik angalaneq isumannaatsuussaaq, Julien Caquineau oqaluttuarpoq.
’Assisted kayak expedition’ ataasiaannarluni pisussatut pilersaarutaavoq.
- Taamaasioqqissinnaanerluta naluara. Maanna oqaatigiuminaappoq angalanissamut suli ukioq ataaseq utaqqisussaagatta, Julien Caquineau naggasiivoq.
Qaannamik ikaareerlutik Canadamiitsiariarlutik tissiartaammik La Louisemik Sisimiunut utissapput.
