Takornariaqarumalluni tuniniaasartut suleqatigineqartariaqarput
Tassa Nunatsinnut angalanissamut aatsaat taama annertutigisumik nittarsaasisoqarmat, takornariaqarnerulernissaq Visit Greenlandip neriuutigaa.
Inersuarmi Adventure Hallimi Visit Greenland takussaavoq, taakkunanngalu Nunatta Angalatitsivia, Icelandic Mountainguides kiisalu Tasermiut South Greenland nittarsaassipput, tamarmillu nunatsinnut takornariartitsinissamut neqerooruteqartuullutik.
Lykke Geisler Yakaboylu Visit Greenlandimi relationsmanageriuvoq, kalaallisuunngorlugu avammut attaveqarnermut qullersaalluni. Taanna pingasunngornermiit tallimanngornerup tungaanut nittarsaavissuarmeeqataammat angalatitsiviit allat aallartitaanut attaveqarneruvoq.
- Taakku aallartitat attaveqarfigisavut tassaapput takornarianik pilerisaarisussat, taakkuuppummi takornarianut attaveqaatissavut.
Nunatsinnilumi takornariaqarnerulernissaa Visit Greenlandip nittarsaassivissuarmiittitaqarneranut siunertarineqartoq. Nittarsaassivissuarmilumi takornarialerisut amerlaqisut attaveqarfigineqarsinnaammata nunatsinnut takornariarnissamut nittarsaassinermut periarfissatsialaavoq.
Nittarsaassivissuaq Visit Greenlandip peqataaffigisaasa ikittuinnaat ilagigaat, Lykke Geisler Yakaboyl oqarpoq.
- Angalatitsiviit aallartitaat soqutiginarsinnaasorisavut tassaapput uagut attaveqarfiginerusartakkavut, nittarsaassinersuillu massumatut ittut qaqutiguinnaq peqataaffigisarpavut, Lykke Geisler Yakaboylu oqarpoq.
