Takornariaqartitsivik Islandimut qanillattorpoq

- Nunani Avannarlerni Killerni takornariat ornittagaasa soqutigineqarnerujussuat pissutigalugu Islandimik suleqateqarnissarput toqqarparput, Greenland Tourismemi tuniniaanermi pisortaq, Lykke Geisler, oqarpoq.

Suleqatigiinneq aallartippoq Londonimi takornarianik nittarsaassinermi, World Travel Marketimi, Island Kalaallit Nunaallu ataatsimoorlutik nittarsaassimmata.

Nunani allani angalatitseqatigiiffiit amerlasuut Islandimik suleqateqarnerat GTE-p atorluarniarpaa, Islandimut takornariat Kalaallit Nunaannut angalasinnaanissamik periarfissagissaarnerummata.

Periarfissaq alla atorluarneqarsinnaasoq tassaavoq, Tuluit Nunaannit Islandimut timmisartumik aqqut. Assersuutigalugu Tuluit Nunaanni Glasgowimit, Manchesterimit Londonimiillu toqqaannartumik Islandimut timmisartortoqarsinnaavoq, Islandimiillu Kalaallit Nunaanni timmisartunut mittarfinnut tallimaasunut Air Greenlandip imaluunniit Air Icelandip timmisartuutaannut ilaallutik takornariarsinnaallutik.

Island Kalaallit Nunaallu suleqatigiillutik takornarianik sullissinissaminnut periarfissaqarluarput.

USA-mit Kalaallit Nunaannut takornariarumallutik soqutiginnittut amerlanerulersimasut GTE-mit maluginiarneqarpoq.

- Kalaallit Nunaanni takornariartitsivik Greenland Tourisme Kalaallit Nunaanni takornariartitsiviit arlaqartut peqatigalugit, Canadami USA-milu nittarsaassivoq, Islandimi takornariartitsivik Trade Council of Iceland peqatigalugu, Lykke Geisler, oqarpoq.