Takornariaqartitsisut: Isumaqatigiissusiortoqarli

Nunatta Islandillu akornanni timmisartuussisarnerup tungaatigut iliuuseqartoqartariaqalersoq, kujataani takornariaqartitsinermik sulisut ujartorpaat.

Narsarsuup Islandillu akornanni aasakkut timmisartuussisarnermik isumaqatigiissut ukioq manna aggustimi atorunnaassaaq. Isumaqatigiissut ukiuni pingasuni atuussimavoq, sulilu nutarterneqarsimanani. Isumaqatigiissusiortoqarnissaa anguniarlugu kujataani takornariaqartitsisut, Destination South Greenlandimit, Islandimilu angallannermut ministeriaqarfimmit, attaveqarnermut pisortaqarfik marsimili attavigineqarsimagaluarpoq sulilu akissuteqartoqarsimanngilaq.

Nutaamik isumaqatigiissusiortoqartariaqarluinnartoq, nunani allani angalatitsisut piumasaraat, taakku aappaagussamut pilersaarusiulereermata.

Sapaatip akunnerup siuliani takornariat pillugit paasiniaaqatigiittoqarmat ajornartorsiut sammineqarsimavoq.

Kujataani kommunit 300.000 koruuninik tapiissuteqareerput, Islandimilu angallannermut ministeriaqarfik 1,2 million koruuninik tapiissuteqareerluni. Nunattalu tungaaninngaanniit 1,2 million koruuninik tapiisoqartoqarnissaa utaqqimaaginnarneqarpoq.

Destination South Greenlandip pisortaa, Tina Jensen, oqarpoq takornariat Islandikkoorlutik kujataanukartartut 1000-iusut, naatsorsuinerillu takutikkaat aningaasat kaaviiaartitat 11 million koruuninit amerlanerusut.

- Takornariat eqqarsaatigalugit, isumaqatigiissusiortoqarnissaa isumannaartariaqarparput, Tina Jensen oqarpoq.