Takornariaqartitsinermi pilliuteqareersut eqqugaassangatinneqarput

Takornartiartitseqatigiiffimmut Destination South Greenlandimut kujataani kommunit pingasut ingerlatseqatigiiffigisaannut Narsap Nanortallillu kommunii aningaasaliisarunnaarniarpata, takornariartitsinermik suliallit pilliuteqareeqisut eqqugaassasut, Qaqortumi Inuussutissarsiornermut Suliffeqarnermullu Ataatsimiititaliap siulittaasua,

Kaj Egede, oqarpoq.

- Inuussutissarsiorut nammineerlutik aningaasaleeqataanikuupput, aningaasaliinertillu annaasussaavaat aningaasaliinerallu naleeruttussaavoq suleqatigiiffik atorunnaarpat.

Kujataani kommuneqatigiit Nanortalimmi ukiarmi ataatsimiinnerannut atatillugu Narsap Nanortallillu kommunii suleqatigiiffimmit tassanngaanniit tunuarniarlutik oqaaseqarput.

- Taamatut pisoqassappat suleqatigiinneq namminersortut aamma peqataaffigisaat unittussanngussaaq aamma kujataata ataatsimoortumik takornariaqarnikkut nittarsaanneqarnerat unittoortussaavoq, Kaj Egede nangippoq.

Qaqortumi Inuussutissarsiornermut Suliffeqarnermullu Ataatsimiititaliap siulittaasuata aarleqqutigaa takornariaqarnerup kinguariarujussuarnissaa kommunillu kattutilivinnerisa nalaani kujataata tamariusumik ataatsimoortumik nittarsaanneqarnerata unittoornissaa.

- Namminersortut soorlu turistforeningit takornariaqarnermi allaffiit, sulifeqarfiillu allat aningaasaliiffigineqartarnerat kipisussaavoq. Takornariaqarnikkut soorlu Blue Ice-ikkut, Qaqortumi turistforeningikkut assigisaalu ingerlatsinerminnik ajutooriaannaapput taama pisoqassappat.

- Aamma takornariakinnerulissaaq, Kaj Egede oqarpoq.

Narsap Nanortallillu Kommuniinit oqaaseqartitsisinnaasimanngilagut.