Takornariaqarnikkut suleqatigiinnialerput
Tasiilaq Illoqqortoormiullu takornariaqarnikkut suleqatigiinnialerput. Suleqatigiinneq taaguuserneqartoq ”Destination East Greenland” sinerissap sinnerani kommuneqarfiit takornariaqarnermi suleqatigiittarnerattut aaqqissuussaavoq.
Suleqatigiinnermi tuniniaaneq tuniniaanermillu ineriartortitsineq ataatsimut ingerlanneqassapput. Tunumi kommuneqarfiit inuussutissarsiornikkut annikitsumik tunngaveqartut illuatungaani nunatsinnut takornarianit ornigarneqarnerpaanut ilaapput. Taavanilu takornariat suli amerlanerusut pisariinnerusumik tikittalernissat suleqatigiilernermi anguniagaasoq, Distination East Greenlandip pisortaa Anders Stenbakken ilisimatitsivoq.
Tunumi atakornariaqarnikkut suleqatigiinnermi internetti aqqutigalugu paasissutissiinermi nittartagaq ataaseq pilersinneqassaaq. Nittartakkami Tunumi qanoq isilluni angalanissaq kisimi paasissutissiissutigineqassanngilaq, aammali Tunumi kulturi, inuit pinngortitarlu ilanngunneqassapput.
Ukioq manna Tunumi takornarianut qimussertitsisarneq ineriartortinneqassaaq, tassani qimussernerit assigiinngitsut soorlu qimussersinnaanermut allagartartaarneq ullunilu arlaqartuni qimusserneq neqeroorutinngussallutik.
Tunumi takornariartitsinermi aaqissuussineq internettikuinnanngitsoq aammali tusagassiortumik assiliisumillu qaaqqusinikkut nittarsaanneqassalluni, Anders Stenbakken Distination East Greenlandip pisortaa oqarpoq.
