Takornariaqarnerulernissaq ilimagisinnaalerpaat

Nunarsuatsinni takornariartitsiviit amerlanerit nunatsinnit suleqatigineqarusupput. Taamaammat USA-mi nittarsaassinersuarmi peqataasut nutaamik atsioqateqarput.
marsip 17-at 2011 07:36

Umiarsuarnik takornariartaatinik takornariartarneq pillugu USA-mi nittarsaassinermi, "Cruise Shipping Miami"-mi, Kalaallit Nunaanniit peqataasut aatsaat taama amerlatigaat. Peqataasut aqqanillit takornariartitsivissuarnut nunarput nittarsaappaat.

Taamatut nittarsaassinerni nunarput 1990-ikkut aallartinnerannili aallartitaqartalerpoq. Nunatsinni Takornariaqarnermi Inussutissarsiornermilu Siunnersuisoqatigiinneersoq, Malik Milfeldt, kalaallit peqataasartut sinnerlugit ataqatigiissaarisutut ukioq-manna peqataavoq.

Takornariartitsiviit nutaat Kalaallit Nunaannut soqutiginninnerulernissaat

Malik Milfeldtip pisariaqarnerarpaa, taamaammat nittarsaassinermi peqataasarnerup saniatigut allatut iliuuseqartoqarsinnaanerarlugu.

- Kalaallit Nunaata Paggivittammik, Islandimik, Savalimmiunik qeqertanillu Orkney-inik suleqateqarnerata ingerlatiinnarnissaa qinerparput. Taamaammat CINA-p, tassa Cruise Islands of the North Atlantic"-ip, suli annertunerusumik suleqatigilernissaanik pilersaarut nutaaq atsiorparput, Malik Milfeldt oqarpoq.