Takornariaqarnermut sullissisut isumasioqatigiipput

Kujataani takornariaqarneq pillugu Qassimiuni isumasioqatigiinneq tallimanngormat naammassivoq.

Paamiunit, Narsamit, Qaqortumit Nanortalimmiillu takornariartitsinermi pisortat, akunnittarfinni sulisut, angallassisartut, katersugaasivilerisut, kommuniniillu aallartitat isumasioqatigiinnermi peqataapput.

Nunatta kujataata avammut nittarsaalluarnissaa, attaveqaqatigiinnerillu patajaallisarnissaat peqataasunit kissaatiginartinneqarput.

Takornarianut nunatta kujataa tikissallugu pilernarnerusunngortinniarlugu suleqatigiissitaliat eqimattakkaarluni oqallinnerisigut, oqalugiarnerillu iluaqutsiullugit Kujataa ornikkuminarninngortinniarneqarpoq.

-Tikiffinni nerisassiat, oqaatsit, nipilersukkallu aqqutigalugit pilerisaarineq ingerlanneqassasortaaq, Destination South Greenlandimi pisortap Tina Jensenip radioaviisimut oqaatigaa.

Neriniartarfiup ”Napparsivik” Qaqortumiittup igasui qallunaatsiaat nerisassiaasa suliarineqartarnerat tunngavigalugu sassaalliivoq, Hotel Narsarsuullu igasuisa aalisakkat, mattaat, ammassat panertut, puisip tuttullu neqaat mamarunarsaakkat sassaalliutigalugit.