Takornariaqarnermut politikkissaq oqaluuseraat

Takornariaqarnerup immikkut politikkeqalernissaa kommunalbestyrelsimut apriilimi qinersinerup kingorna, Narsap Kommuneani Inuussutissarsiornermut Ataatsimiititaliami nutaamik ilaasortaalersut ilungersuullugu oqaluuserilerpaat. Ataatsimiititaliaq marlunngormat pingasunngormallu tamanna pillugu isumasiortitsivoq.

Narsami suliffeqarfiit ilaasa sinniisaat, Peqatigiiffiit Suleqatigiiffiat, Narsami Takornariartitsivik Kujataanilu takornariartitsivik Destination South Greenland, takornarianik angallassisartut, unnuisarfiutillit kommunimilu qinikkat qaaqquneqarsimapput.

Narsap Kommuniani innuttaasut takornarianut saqquminerulernissaat anguniarlugu, takornariaqarnermi politikkissaq erseqqissarneqassaaq. Politikkissap kommunalbestyrelsimut saqqummiunneqarluni oqaluuserineqannginnerani, sulinasuartussamik tallimanik inuttalimmik ataatsimiititaliortoqarpoq.

Ataqatigiissumik takornariartitsinerup qanoq ittup siunnersuutiginerata saniatigut suliniutissat aningaasalersorneqarnissaat pilersaarusiorneqassaaq.