Takornariaqarnermut pisortaq: Sullissinermut isumaqatigiissutit eqaannerusariaqarput

- Takornariaqarnermut taamaalillunilu nunap immikkoortuata ineriartornissaanut, Tunup annassutissaatut oqaaseq atorneqartoq tassaavoq tikinneqarsinnaaneq, maannakkullu tamanna ajornarluinnarpoq, taama oqarpoq Nunatsinni Takornariaqarnermi Inuussutissarsiornermilu Siunnersuisoqatigiinni pisortaq Anders Stenbakken.

Piffissami sivitsulersumi Kulusuup Tasiilallu akornanni timmisartuussisarnerup, Namminersorlutik Oqartussat sullissinissamik isumaqatigiissutaanut pituttorneqarsimasumut, takornariarpassuaqarneranullu angummassinnaanngilluinnartumut, Ammassaliup eqqaani takornariaqarnermik suliaqartut isornartorsiuinerannut taamaalilluni taanna ilannguppoq.

- Takornarianik angalaartitsisarnerit Island-imiit Tasiilamut ulloq ataaseq atorlugu pisartut, maanna nunap immikkoortuani tassani angalaartitsinerit ullunik marlunniit sisamanut sivisussuseqartut inunnit pisariugineqartalerput. Taamaalilluni ineriartortitsinissamut periarfissat tassaneereerput, kisiannili maannakkumut timmisartuussisarnissat malinnaatinneqanngillat, Anders Stenbakken oqarpoq.

Taanna isumaqarpoq qulimiguulinnut akigitinneqartut piviusorsiorpalaartuusut, nunallu sinnerani sullissinissamik isumaqatigiissutitulli, tapiissutit atorlugit ingerlanneqartutut allatuulli ingerlanneqaratik.

Namminersorlutik Oqartussat tapiissuteqartinngikkaluarlugit ingerlaarfik atorlugu suliffeqarfiit allat timmisartuussisinnaanerat inatsisitigut ammaffigineqarpoq. Tamannalumi inuussutissarsiutip nammassinnaagaa takuneqarsinnaappat kikkulluunniit timmisartuusisinnaapput, Ineqarnermut Attaveqarnermut Angallannermullu Naalakkersuisoq, Jens B. Frederiksen oqarpoq.

Kisiannili tassa tamanna kialuunniit aallartissallugu sapiissuseqarfigilersimanngilaa, Anders Stenbakken oqaluttuarpoq.

- Eqqoriarpara Kalaallit Nunaat takornarianit 60.000-nit  tikinneqartartoq, takkunannga affaat umiarsuarnut ilaasarput, tassalu 30.000-t nunamut takornariartarput, ilarpassuilu sivikitsuinnarmik maaniittarput,  timmisartuussinerillu suliffeqarfinniit nunatta avataanersunit ingerlanneqarsinnasut niuernerinnarmik toqqammaveqartut ajutoorfiusinnaapput, isumaqarpungalu tamanna amerlasoorpassuarnut tunuarsimaartitsisuusoq, Anders Stenbakken oqarpoq.

Taassuma taarsiullugu siunnersuutigaa, Namminersorlutik Oqartussat sullissinissamik isumaqatigiissutinik nutarterinerminni angallaffiunerpaap nalaani timmisartuussinerunissaq ilannguttariaqaraat.

- Siunniunneqarsinnaagaluarpoq sullissinissamik isumaqatigiissut eqaannerusoq sananeqartuuppat, taamaalilluni timmisartuussinerit isumaqatigiissummi pisussaaffiliisumiit annertunerusut ingerlanneqarsinnaaqqullugit, Anders Stenbakken oqarpoq.